Friday, January 21, 2011

أمي الله يحفظها .... وآلفهااااااا.... وأحفادها

  كان الحوار اليوم عند أمي طول الله عمرها 
"طبعا " عن المكرمه الأميريه
وشلون بيصرفونها و الجيل الصاعد يبون
كل شئ أبد جنها مليون مو ألف دينار
وكلوااااا  قلب أمي إن توزع ألفها عليهم
جان تلتفت عليهم أمي الله يحفظها
والله إنكم ماتشبعون وما يترس عيونكم  الإ التراب
وكل من قام  يسألها  "يمه" شبتسوين فيهااا
الأقربون أولى بالمعرووووف...؟؟؟؟؟؟
ردت أمي  ... والله الحسنه مو فيكم
الحسنه بهالفقاره والمساجين اللى أعرفهم
منها صدقه لهم ..ومنها نطفي حروره العيون عن الكويت
ما قصر شيخنا العود  عطنا و ونسنا
وعلينا إحنا أن نونس غيرنا فيها
 أول واحد بعطيه" طباخي" المسكين اللى خدمنى طول
عمره بعطيه واطيب خاطره ... وبدز حق عياله
وبدز حق"هنديتي سيتا" مسكينه سافرت وماهي
راده .... بأفرحها  و بأفرح عيالها بهالخير
وهم بعطي "هالخياط " المسجين ... منكسر هالايام
ما عنده أحد ... يكسرالخاطر طول عمره بالكويت
لو مقدم على الجنسيه جان أخذها أحسن من وايد
أخذوها طول عمره يحب الكويت ويحب شيوخها
لازم ياخذ نصيب من هالخير خير الشيخ العود
وام محمود وذرها العشره مسجينه ما قصرت كل سنه
تيب لنا تنكة زيت  وزيتون اخضر
و بعد اليمانيه اللى إخدموا أبوكم الله يرحمه
وتركوا الكويت وراحوا لأهلهم.الى الحين يدقون 
ويسئلون عنكم كلكم..لازم يكون لهم نصيب
علشان بركة هالألف تزيد وتزيد وتزيد
كلهم عندهم عيال وأحفاد ما قصروا اشتغلوا  
طول عمرهم عندنا  بأمانه وإخلاص 
وعلينا ان مااااا  ننساهم حتى لو ردوا اديرهم
اللى ينساهم  ...مو وفي
لازم نكرمهم ونوصلهم ولا نقطعهم
بس هذى حال الدنيا بالأخير كل من يرد إلي بيته
ياعيالي أوصيكم كل من يوزع جزء ولو بسيط من ألفه
صدقه ..... علشان تطفي عيون العالم
كلهم  مشبهرين فينا وفى الكويت
ويحفظ ديرتنا ويبعد عنها حسدهم وشر قلوبهم 
ما قصر الشيخ العود عسى ربي يحفظه ويعطيه 
 الصحه والعافيه ويجعل عمره مدد مو بعدد 
خل خيره  يوصلهم  مثل ما وصلناااااا 
******
شرايكم بكلام الوالده...طبعا ما أقدراقول شيئ بعدها
ولازم  أطيعها وأخذ بوصيتهاااااا
وانتوا شلوووون بتصرفونهاااااا ...؟؟؟؟؟
وسلااااامتكم

27 comments:

Katkoota xD said...

صح لسانها

و الله يحفظها و يخليها لكم يارب

بصراحة انا مادري شبسوي فيها للحين

جاري تحميل الافكار ;P

حسـّون الملعـون said...

إسمحيلي إختي

أفضل انواع الصدقة هي لما الشخص المحسن ما يعلنها ويخليها بالسر بينه وبين نفسه

أعتقد في حديث شريف بما معناه إن الإيد اليمنى اللي تعطي, ماتدري عنها الإيد اليسرى

الله يخلي الوالدة وفعل الخير اللي راح تسويه كله بميزان حسناتها, هي بلغتكم بنيتها بهذا الفعل على اعتبار إنكم من العائلة ومن المقربين لها, وأيضا قد يكون لتشجيعكم على فعل أمر مشابه له

لكن

مسألة التفاخر بكتابة بوست وبكل التفاصيل, هذي تقلل من حسنات هذا الفعل, لأن ساعتها الأمر راح يتحول (ولو بغير قصد) إلى نوع من الرياء


وشكرا

Enter-Q8 said...

انا اقول ياخذون المنحة منكم
الاخ حسون
هل تعلم معنى كلمة ملعون
يقال ان لكل حامل اسم نصيب من اسمه
و ارجوا ان لا يكون كذلك

ebtsamh said...

ما نقص مال من صدقه ..

الله يبارك لها

تفاصــيل said...

الله ايخلي لكم الوالده وايطول بعمرها
بس اللي فهمته من البوست ان الوالده حاولت بشكل غير مباشر انها تشرك العرب معاها وهذا ايدل ان عندها جينات قوميه عروبيه نابضه :) ومن مبدأ نفط العرب للعرب فالوالده اتقول ان منحه ابونا العود ايضا لابد ان العرب ايشاركونا فيها .. مع انهم ولامره قالوا زيتون العرب للعرب او تفاح العرب للعرب .. الخ واتمنى فعلا ان الوالده الله ايطولي بعمرها تلتفت اشوي لنفسها وتشتري شي حق روحها لان الواحد لازم يكافئ نفسه ... وشكرا

قطرة وفا said...

عين العقل :)

الله يوووفقها دووم ان شاء الله و يخليها لكم :)

الأخ حسون :


ربما قصدها أن تدعو لهذا الفعل الحسن بطريقة غير مباشرة

فلنحسن الظن بالناس

موفقين :)

Mrs. Purple said...

فديتها والله

تجنن الله يطول بعمرها ويعطيها ويزيدها وان شاء الله الصدقه هذي تحصلها دفاعة بلا واجر عند رب العالمين

عيبني رد تفاصيل :)

Anonymous said...

جزاها الله خير الوالده فالدال علي الخير كفاعله

امانه سلميلي عليها وبوسي راسها ذكرتني ادز حق خادمه خدمتنا عمر

وصاجه العيون مفتوحه علينا ومشبهرين فينا الله يكافينا شرهم

ولا تنسين التموين تشاركين المحتاجين فيه بعد
مع اني متأكده ان الوالده الله يحفظها ما فاتها هالشي

Sami said...

تستاهل سيتا :)

aL-NooR . said...

يا حلو سوالف الشامية
:*

هالالف صارت حديث الناس
هههه

star said...

الله يبارك لها بعمرها ورزقها ويرزقها ألاف مؤلفه من الحسنات والدعوات الصالحه
سلمي عليها والله يطيب خاطرها بإلي يسرها مثل ما ناوية تطيب خاطر هالناس

kaashteeel said...

انا الي الان اطمح

الي قرار ثوري يلغي او يحول المنحه
الي من يحتاجها من المواطنين فقط
او كما قال جاسم السعدون ممكن بناء 20 الف وحده سكنيه

يااااااالله السلامه
"""""""

كششتيل

بنت الشاميه said...

Katkoota xD :

وصح من قال
الله يحفظج ويخليج يارب

بنت الشاميه said...

حسـّون الملعـون :

هالجيل سقف الانانيه وااايد
مرتفع عندهم وكله يبون ياخذون
ولا يعطون
فكانت الوالده تعمل بحديث رسولنا الكريم وتعلم عيالها واحفادها
قال رسول الله صلي الله عليه وسلم ""
مَنْ سَنَّ فِي الإسلام سُنَّةً حَسَنَةً فَعُمِلَ بِها بعْدَهُ كُتِب لَه مثْلُ أَجْر من عَمِلَ بِهَا وَلا يَنْقُصُ مِنْ أُجُورِهِمْ شَيْءٌ،...... "" فْكانت تعطيهم درس ديني واخلاقي بالتذكره وتركز عليهم بالاحساس بالاخر وقت الرخا ووقت العسر

******
وباخذ ردك بحسن الظن بك وبكتابتك

العفو

بنت الشاميه said...

Enter-Q8 :

انت تامر ...تستاهل

يكفي طلتك عليناااا
حياك الله

بنت الشاميه said...

ebtsamh :

الله يبارلج بعمرج

تحياتي

بنت الشاميه said...

قطرة وفا :

الله يخليج ويحفظج يارب
مششششكوره

بنت الشاميه said...

تفاصــيل :

امي الله يحفظها ما تعرف
القوميه وين طريجها
وبعد الغزو صارت عنصريه اكثر واكثر

وهذول ناس احتكت فيهم بحياتها وعرفت معدنهم الاصيل وحبتهم
وهي تصل من وصلهم الوالد رحمة الله عليه
وفاءا واخلاصا له
والناس للناس هذى هي الحياة
مشكوره و حياج الله اختي

بنت الشاميه said...

Mrs. Purple :

مشكوره يالشيخه
يا حلوج يا حلو اهل الامارات كلهم
انتو اهل الطيب والبركه

حياج الله

بنت الشاميه said...

Anonymous :
انت المشكوره على هالكلام الحلو
يزاج الله خير
وسلامج وصل لها
وتقول انها تسلم عليج وتشكرج
و تسلم على امج وكل من يعز عليج

حياج الله

بنت الشاميه said...

Sami:

مشكووور

بنت الشاميه said...

aL-NooR :

مشكوره يالغاليه
الله يحفظنا من كل حاسد
حياج الله

بنت الشاميه said...

star :

يا حلوج وياحلو هالدعاء للوالده
لا خلا ولاعدم عسى عمرج طويل يالشيخه
ما قصرتي
ترا قريت لها كل ردوودكم عليها
تقول فضحتيني عند ربعج
استحت امي ...لووووول
تراها تسلم عليج سلام جثييير
وتقول ياحلوهم ربعج يبردون الروح
:*
مشكوره حياج الله

بنت الشاميه said...

kaashteeel :

اليوم صاير ثورجي
المظاهرات بالوطن العربي حركت هالمشاعر الثوريه عندك
*
*
عاد تبي الصج
والصج هالايام
الكل يزعل منه
ولا يتحمله احد
عورني قلبي
على المليار و409 مع التموين
مبلغ مهوول الكوبت اكثر حاجه له
ما اقول الا ياااا الله العافيه

حياك الله

..pen seldom said...

يا رب يسلم لك الوالدة

ياطيبها وطيب قلبها ..

تصدقين , حسيت أني سمعتها وأهي تتكلم
وأحس اني أعرف الأسلوب اللي أتخذته في الكلام ..

قلبها نظيف وأبيض , فكرت في اللي خدمها وخدم وطنها يوم من الأيام قبل نفسها ..

=)

الله يخليها لكم يارب ..

ويعطيها على قد نيتها ..


تحياتي لك ..

q8 transs said...

صباح الخير
ماشاللللللللله :)
الله يخليلج الوالدة ويطول بعمرها ولجميع المسلمين يارب

ياريت الكل يفكر ويسوي نفس الشيي
والله ان العطاء سعادة للمعطي قبل المتلقي
وسبحان الله الله يبارك للإنسان جذي ويزيده ماينقص منه شي والله


تسلم ايدج على الموضوع
بتخلين وايد ناس يفكرون بطريقة ثانية في كيفية صرف الفلوس:)

تحياتي لج،،

q8 transs said...

قريت رد احد الأخون وهو انه الصدقة لازم الواحد مايعلنها وفعلااا صح كلامه
ولكن ماعلي ياخويا لكريم اسملي انا بعد اقولك انه الاخت صاحبة الموضوع الله اعلم بنيتها شنو لما اكتبت هالموضوع
اكيد ماكان قصدها شوفوا والله امي بتعطي والخ ولكن القصج كان اكيد هو تبينه الكثرين على موضوع الصدقة بالعفلوس خاصةانه الحمدالله ناس وايد موقاصر عليها شي وفي ناس بالعكس محتاجه ويمكن ماتقول

حتااااااااا انا نفسيييي والله فكرت بوايد شغلات من الأفضل اني اسويها بالفلوس من بعد ماقريت هالموضوع
مو معناه انه الواحد منا موعارف او ناطر احد يقوله
ولكن ان الله سبحانه وتعالى يقول في كتابه الكريم
"فذكر إن الذكرى تنفع المؤمنين"


وهم الإخت الي كاتبه الموضوع إحنا ماتعرفها ولانعرف والدتها الكريمة ولا والدتها كااااانت تدري واهيا تسولف انه بنتها بتكتب فهذا كله المفروض كان يخليك تاخذ اأمر بحسن نية وليس من باب انها كاتبه عشان تقول وتقول
بالعكس اهيا قاعد تقول من باب النصيحة
وكلامها ليش انها وايد يحمل صفة شخصية ولانه السالفة صجية مثل مايقولون ونقلتها تماما كما هيا فهالشي والله زاد من تحريك مشارنا للموضوع وخلانا ننفعل ونقول اي واللللللاه صح الكلام الي نقراه ونسمعه

وبالنهاية الله سبحانه اعلم بالنوايا ياخوي الكريم واعلم كل واحد ليش يقول سويت وسويت احيانا بهدف النصيحة
على سبيل المثال لو عندك اخوة او اولاد صغار ماراح تقول لهم أحيانا نفس الكلام عن عملك للخير م باب النصيحة ؟؟
اكيد الجواب نعم
فالموضوع هني نفس الشي


وشكرا لكي إتي الكريمة مرة ثانية على الموضوع وجعله الله في ميزان حسناتك
:)