Sunday, December 13, 2009

انا ..... الخليجي

نرحب بضيوف الكويت وحياهم الله
تحتضن الكويت غدًا الاثنين القمة الـ 30

لقادة دول مجلس التعاون الخليجي
من وعينا واحنا نسمع ونعيش منظومه

مجلس التعاون الخليجي
انزرع حبه فى قلبي

مع إني ما كنت أشعر بنتائج هذا المجلس
ولكن .... بعد الغزو الصدامي للكويت
أصبح هالمجلس منظومه سياسيه اجتماعيه

عزيزه جدا على قلبي
تفرحنى إجتماعاتهم وأحس يوم الإقتتاح
يوم عيد مشرق فى سماء الخليج
مع العلم لو تسألوني ماذا قدم لك هذا المجلس..؟؟
ومع كل التحاليل السياسيه والاقتصاديه والرياضيه

والصحيه والتعليميه والامنيه والدفاعيه
المحبطه ودون المستوى المطلوب

واللى طبق منها ونجح ... قليل القليل
ما عندي جواب مباشر
عندي إرتياحى النفسي فقط
يكفى لما أسافر إلى أي دوله منهم
أحس إني بديرتي و اني بالكويت
هل عندكم مثل هالأحساس..؟؟؟؟؟؟
هل تحس إن هالمجلس قدم لك شيئا ملموس
وواضح فى حياتك اليوميه...؟؟؟؟

غير السفر بالبطاقه المدنيه
ماذا يعني لك مجلس التعاون الخليجي....؟؟؟؟؟
نكشششششه
75%
من مساجد مصر بدون مآذن
جان زين احد يخبر الطبطبائي بهالمفاجاة
وسلااااامتكم

11 comments:

lawyer said...

مامنه فايده و لا عايده غير تسكر الشوارع

ARTFUL said...

سمعت بأن البيان الختامي للقمه

مكتوب من الحين

!!

بنت الشاميه said...

lawyer :

صباج الورد

زحمه يا دنيا زحمه
هذا كله من ديرتج
اللى ما توسع شوارعها
ماتشوفيني منحكره بالبيت

مجلس التعاوت ما عليه من زحمتكم

((((:

بنت الشاميه said...

ARTFUL :

هذا شيئ متعارف عليه بكل القمم

ويصير فيه تعديلات بسيطه
قبل تقديمه بالختام

لا تستعجلون على رزقكم
((((:

ZooZ "3grbgr" said...

حيا الله ضيوف الكويت واهلها اهل الخيج
نورت الكويت



بس عندي ملاحظه بعد اذنج يالغالية

ولكن .... بعد الغزو الصدامي للكويت
أصبح هالمجلس منظومه سياسيه اجتماعيه


بنت الشامية

يا بعد جبدي انتي

تتغشمرين ولا صج؟؟؟؟

الغزو الصدامي؟؟

ليه هو صدام جه لوحده؟؟

الغزو العراقي للكويت

وليس تحاملا على العراق

ولكن لابقاء التاريخ حقيقيا فلا يطمس مع الوقت لنورث تاريخا لأبنائنا بان العراق جاء الكويت طق فره ورد

!!!


عز الله لو ربيناهم على جذي وعيالهم رباهم صدام على ان الكويت لهم من المدارس ساعتها بيصير غزو ثاني وثالث بعيد الشر


:/

Yara said...

صباح الوحدة الوطنية..كلامج صحيح حتى أنا ارتباطي في مجلس التعاون ارتباط عاطفي احسهم عزوة وسند

بو عبدالملك said...

اما على المأذن موضوع طويل مالي خلقه

بنت الشاميه said...

ابو عبدالملك :

اشوه اذا مدونتى تشرج صدرك

الله يهداك يابو عبد الملك
ادري والله انه مو قصدك ان تودري
وراء الشمس

اذا تبي تخونهم
اكتب بوست طويل عريض فى مدونتك
واكتب فيه كل اللى بخاطرك
مو بمدونات غيرك الله يهداك
مضطره ان امسح تعليقك
لو الشي يمسنى انا بروحى حشى ما مسحته
بس ما ارضى على ولاة الامر
لهم الحشيمة وطاعة الامر

بو عبدالملك said...

لا عادي اخذي راحتج بالمسح
اصلا اذا مسحتي راج تفيديني

وثانيا
لاتقولين ولاة امور لان ولي امر المسلمين يكون مهتم بامور المسلم وفق الكتاب والسنه
هم حكام


ولاتسنين ان الاتباع يكون وفق بصيره فديري بالج
وسلامي لج

بنت الشاميه said...

ZooZ "3grbgr" :

اغلب الشعوب العربيه مقهوره
و مسحوقه ومغلوب علي امرها من حكامهم الطغاة
وخصوصا الحكام البعثيين
ما نسامح هالشعب .....ولكن
نجد لهم الاعذار
بس الحزب البعثي الصدامي بكل ارض
وبكل دوله فى الاردن وفلسطين وفى اليمن وفى السودان
ما نسامحههم ابد ولن نغفر لهم
ابد طول حياتنا
وحياة عيالنا من بعدنا

لا تحاتين التاريخ لن يطمس كل هالحقائق ابد....ما دمنا نغذى فيها عيالنا

ياحلو حماسج ودفاعج عن الكويت
الله يكثر من امثالج ...ويكثر من اللى ما راح ينسى وما راح يسامح
حبيبتى انت

بنت الشاميه said...

Yara :

الحمداله على هالنعمه
والله يديم هالوحده على طول

حياج الله