Wednesday, June 13, 2012

حظج الردي...طيحج فيني


بسم الله وعلي الله توكلنا
قالها أبوعزوووز وهو يقط خيطَه بالبحر
مرت ساعتين وهو على هالحاله
ماكو نابر اليوم "شسالفه" ؟؟ جنه اكو شيئ بالبحر 
شوي والإ يسمع صوت يقوله
صيييدني يرحم والديك صيييدني
بوعزووز إخترع ...لف رأسه يمين و يسار
ماكو أحد
لاااا بالله قمت اهلوس " وهو يكلم روحه
رد الصوت مره ثانيه ، صييييدني صيييدني
لا بالله رحنا فيها...السالفه جنها صج
ووقف مره ثانيه يدور علي الصوت
شوي ....والإ تنط ضفدعه من البحر وتطب بطراده
تخصبق بوعزوووز فوق تحت
سلمت عليه ... وهو لازال مصدوم
ضفدعه و تتكلم.... شهالقدره
ليش انت متعجب؟؟؟ أنا مجرد ضفدعه مسحوره
حولتني ساحرة لعينه لضفدع ليلة عرسي
وهي قصة طويله لن أزعجك فيها
ولكن إذا قبلتني علي رأسي ... أرد لأصلي
أنا أجمل بنت بالقريه وراح أكون زوجتك
وخادمتك الأمينه لك طول عمرك 
بس سوى اللى أطلبه منك لتنتهي مأساتي
حك ابو عزووز رأسه وكرشه ورقبته
وصب عينه حوله... وأخذ يفكر
وظل مده طويله يفكر... حولة العين عند بوعزوز
دليل قاطع إنه يفكر.... بعمق
والضفدعه المسكينه إطالعه وهي ساكته.... وتنتظر رده
وشوي مد إيده وخمطها وحطها بجيبه .....!!!ء
صرخت الضفدعه تقوله شفبك
بوووسني مو تخمطني و تخشني
أخاف تبي تسويني شوربه..؟؟؟؟
رد عليها بوعزووووز الحكيم وقال لها
يا بنيتي أنا بعد كل هالعمر الطويل
ما بقى كثر ما مضى... زواج وعروس... مااااا أبي
كل اللى أبيه بهالعمر.... وحده تكلمني وتسولف وياي
ما أبي أخدم أحد ولا أحد يخدمني ...أنا ما فيني شده
يالله أعابل روحي حنه ورنه بالبيت مأبي.. شأغبر فيج
سمعي يا بنت الناس خلاصة الحجي 
حضج الردي طيحج فيني
اسولف مع ضفدع طول الوقت ابرك لي من كل اللى تبينه
 هذا الموجود عندي والإ البحر يمج ومتروس صيادين وحداقه
شتقولين يابنت الناس اذا صج عاد انت من الناس؟؟؟
هزت رأسها المقروده وقالت حظي ردي من عمري
ياحيل الله ما لي الإ أنت ...والإ الباجي
أدري فيهم مامنهم فايده ولا أمان
ودني بيتك..... ويالله حسن الخاتمه
******
لو طايحه هالضفدعه بايديك .....شتسويلهااااااا
؟؟؟؟؟؟؟
اكيد بتسوي مثل بوعزوووز
البوست مترجم ....مع تصريف وخيال كويتي واسع
***
الحكمه دائما تكون مصاحبه تقدم العمر
   فالإنسان تكون لديه  حصيله  كبيره
 من الحكم والتجارب التي مرت عليه أو علي غيره
أو قد سمعها  أو  رأها 
وهذه هي خلاصة إحدى هذه الحكم
*****
نهاية اسبوع سعيده لي ولكم
وسلااااامتكم

8 comments:

ARTFUL said...

توقعت يبوسها وتطلع ضفدعة نصابة تقزرها على خلق الله

;p

ibnalsor said...

لو كنت مكانه كان اول شي افكر فيه قدرتها على الكلام وقدرتها على الفهم والادراك .. رراح اسألها كم صار لها مسحورة .. ومتى انقطت في البحر .. وكم عمرها .. وشنو اسم قريتها .. وبنت منو .. وراح اسألها ليش سحروها .. وليش اختاروها من بد كل البنات عشان يسحرونها .. ثم ماهو الرابط بين جمالها وقطتها في البحر .. وراح اسألها كم وزنها حين كانت بنت .. وكم طولها .. وشنو كانت لابسه لما سحروها .. وين هدومها .. وراح اسألها ليه السمك ما أكلها .. وليه اختارت اليال عن غبة البحر .. وراح اسألها اهي من اي عصر .. وشنو عادات عصرها وتقاليده .. ثم راح اسألها عن شخصية الساحر اللي سحرها .. وكم عمره .. وليه قطها في البحر ونساها .. وبعد كل هذه الاسئلة .. راح اسألها وش علاقتها في البنت الشامية .. وليه روت لنا قصتها .. ثم وش عرفها في بنت الشامية وهي مسحوره من زمان .. وبعدين راح اخذها للبيت عشان اجري عليها كشف .. واعرف فصيلتها ومن اي الضفادع تنتمي .. واخضعها لتجارب طويلة عريضة .. يعني بالعربي راح تلوم حظها الردي اللي طيحها بديني

منصور الفرج said...

اذا كانت صج احلى وحده بالقريه
فما يبيله تفكير :)

بس الخوف يطلعون كل بنات القريه ضفادع بهيئة ناس و اتوهق فيها

تسلمين

secret said...

نهاية اسبوع حكيمة للكل

:)

بنت الشاميه said...

ARTFUL صباح الخير
لا ياحافظ الدنيا لازالت بخير
واصابع ايدك مو وحده ضفدعتي من الناس الطيبين الخيرين المحبين ....لا تتشائم الدنيا طيبه

بنت الشاميه said...

ابن السور

الله الله الله بتنشف ريجها من التبحث والتقصي بكل هالاسئله
اصلا بتهون عنك وبتنط البحر
مره ثانيه ...اكيد هذي مو اول طراد تنط فيه ....وتهون عن صاحبه
اهي ليش رضت بالشايب...اهي ادري بالبحر واصحاب البحر
الشايب بيسألها كل هالاسئله
بس كل سؤال بيوم
ويعيد قصة الف ليلة وليله
بالتنشد و بالراحه وعلي فرااااغته ليؤنس ما تبقى من عمره و تضيئ ايام وحدته بس على هواه اهوه .... مو هواها .... وشدريك الايام شتسوي فيه بعدين ؟؟؟... يمكن يمكن يمكن بالاخير يقبل راسها ويحقق طلبهااااا
لووووووول
اسعدني مرورك وغشيييت من الضحك على تعليقك ...شكرا لك
وحياك الله

بنت الشاميه said...

منصور الفرج


انت جرب اول ...وبعدين قول لنا النتيجه....بضاعتي اصليه مو مضروبه
هههههههه
حياك الله

بنت الشاميه said...

secret :

اسعد الله كل ايامك
نحن بحاجه هذه الايام لكثير
من الحكم والمواعظ
تحياتي