Tuesday, September 29, 2009

لو علمت الغيب...لإخترت الواقع

أمس كانت جمعتنا للربع الأول من السنه
مع حبيبات قلبي
ومسمين لقائنا جلسات علاجيه
صحيه نفسيه روحانيه فضفضيه مجانيه
نقول كل اللى نبيه ولا نخلي بخطرنا شيئ
بس لازم تكون هاللقاءت فى بيت وحده منا
علشان محد يسمع شيئ من اللى نقوله
ويظل الكلام بالحجره اللى إحنا فيها ما يطلع
من بابها ولا يسمع فيه أحد غيرنا
وهذا عهد ماخذينه على بعض من زمان...ونجح
تكلمنا كالعاده فى مواضيع وكثيره ومختلفه
ما بقى شيئ ما تطرقنا له
جان تسألنا وحده منا
لو رجع الزمن ورا
ماذا تريدين أن يتغير بحياتك ..؟؟؟؟
و ليش هذا التغير...؟؟؟؟
ومدى أثر هذا التغير فيها ..؟؟؟؟؟

طبعا صارت الصيحه وكل من تجاوب قبل الثانيه
ومووووو بالدور....كعادة نون النسوة
**اللي تبي لو أنهاتزوجت أول واحد خطبها
وأمها ما رضت عليه
**اللي تبي تغير تخصصها العلمي
**واللي تقول ياريتها ما تزوجت
**واللي تقول لو إنها طايعه ريلها ومهاجرين
واللي تقول ياريت متزوجه ولد يرانهم اللي
**ماتزوج إلى الحين....جان ما صار حالها جذي
واللى قالت الحمدلله ما أبي أغير شئ حتى
**لو يعيد الزمن نفسه
واللي قالت ما أبي أغير شيئ بحياتي
**يالله انا قادره أكمل هالمره شيئ يديد مالي خلق
و.........و......و........و
أشياء وايد قلناها بكل شفافيه وصدق وحريه
وندري إن ماااااااا كو شيئ راح يتغير
والوضع راح يتم كما هو عليه....لا تغييير
الإ القليل واليسير يمكن يمكن أن يتغير

بس على الأقل ضحكنا و فشينا خلقنااااااا
الحين الدور عليكم شنو تبون تغيرون بحياتكم ؟؟؟؟
وهل فاتك وقت التغير ؟؟؟؟؟
أو
لازال هناك كثير من هذا الوقت ؟؟؟؟؟

وسلاااااامتكم

43 comments:

الاوركيده said...

مساء الخير

تبين الصج سؤال حلو ساعات وايدة اسأله حق روحي بس اقول في النهاية لايمكن التغيير بالمحاولة بعمل الافضل بالمستقبل :)

اكثر شي احاول اغيرة او مو اغيرة بالضبط بس قرار اتراجع عنة وهو اني لما فكرت اني ما اييب عيال في اول زواجي واخرت الموضوع 3سنوات احس ودي الحين ولدي وبنتي اكبر من العمر اللي هما فيه بس الحمدالله الله بفرحني فيهم

:)

BeeDoO said...

الخيرة فيما اختاره الله

ولو كنت باختار .. لاخترت الواقع

لو تدرين اشكثر غيرت فيني وفي مجرى حياتي هالكلمة

Icarus said...

شنو أغير؟؟؟

ممكن تخصصي في الجامعة مع إني تخرجت الأول على الدفعة
@@

كويــتي لايــعه كبــده said...

اتمنى لو تحجبت أبكر

اجار الدين كشمش said...

بنت الشاميه ..بوستك حريمي خالص خالص
ولم تطلبي مشاركة راء ..الرجال يمكن سسقطنا منك سهوا.. مااااعلينا !!!!1

انا شخصيا ..تعرضت لاكثر من صدمه من الثقه المطلقه ببعض الصداقات مع الشباب

وخاصة اني لم اقدر من هو اللذي يمكن ان احسسن اليه

وانصح اخواني الشباب ابتعدوا ..او الاصح ان لا تطوروا الصداقه مع البخيل وهرب منه بلباقه من اول اكتشافك لبخل معارفك
لانه سوف يكون مغثه دائمه على كل شعورك
ويحرولك ..ويحرول كل مخططات
الربع

بالكويتي عله ..اذا عاد الزمن لاااااااا اصادق بخيلا ابدا ابدا

فمالله

Q8EL5AIR said...

هذي شكلها موقعده مصارحة .. اخاف خلية ارهابية بس مسويتلها تمويه !!

ماتبون احد يسمع !!

:):):):)


وتحياتي ..
ويسلموااااااااااااااااااا :)

الزين said...

آآخ يا بنت الشامية

سؤالج مو سؤال

مدري شنو بس عور قلبي

تدرين عاد شنو اغير

امسح اخر 7 سنوات من حياتي

اشق واخبن على قولتهم

ولا كأن اللي جرى ماكان

واذا الموضوع فيه انتقائية فممكن احتفظ ببعض الناس اللي فعلا معرفتهم كانت ولازالت لي مكسب

غيره

اخببببن

:)

ترى من صجي
!!

جبريت said...

الي احاول اغيره فيني ولا شي لانه الزمن والمحيط الي حوالي يفرض علي حياتي بشكل غير مباشر ومباشر


لكن قولي بينج وبين نفسج لو انه كل الي شفتيه وصار بحياتج بأحداث متتاليه مجرد حلم كئيب وجميل وممتع وممل بنفس الوقت وتصحين من النوم عمرج 10 سنوات نقول؟؟؟

شنو راح تسوين بالحاله هذي؟؟؟

Anonymous said...

موضوع جدا مثير أنا شخصيا أعتقد أني مثل أي شخص مريت بمواقف كنت فيهاجدا سعيدة و أخرى حزينةو بعد مواقف حسيت أنه التغيير كان أحسن لكن أنا لم ألجاْ اليه في ذلك الوقت و أكيد وقتها عاتبت و لمت نفسي كثير و لكن مع مرور الوقت كان الحمدالله ربي يوريني الحكمة من هذا المنع فهو أكيد بالاخر خير لكن الانسان دايما عجول و نظرته جدا محدودة انما رب العالمين هو أعلم بالغيبيات فعسى أن تكرهو شيئا و هو خير لكم و عسى أن تحبو شيئا و شر لكم و الله يعلم و أنتم لا تعلمون

و الله أنا الان جدا راضية عن واقعي الحمد الله و لكن اجابة على سؤالك الجميل لو وددت تغيير شيء في حياتي فهو عدم فقداني لشخص عزيز جدا على قلبي و لكن شاء القدر و فرقنا و أتمنى من أعماق قلبي أنه الله يجمعنا مرة ثانية على خير و اسفة للاطالة

star said...

صباح الخيييير

عسى ربي يديم جمعتكم على الخير ولا يغير عليكم لا فاقد ولا مفقود

وألحين نرجع حق السؤال ؟؟

ضرووووري انه نتصالح مع الماضي بكل عيوبه و مزاياه .. أفراحه و أحزانه .. قراده أو بخت و حظ يكسر الصخر

حسافتج يا كويت said...

كنت ابي أطلع بالمركز الثاني في سباق الحيوانات المنوية واخسر هذا السباق ولا أطلع حق هالدنيا

ولا حساب ولا عقاب واكون نسيا منسيا

وكيفكم دشوا الجنة او النار وانا مالي شغل


يا الله رحمتك

mob said...

تقتلون هوى النفس انتن القوارير

من اجل ماتسمونه العيب وليس للعيب
تفسير محدد خاصة اذا كان الموضوع

بين المرء ونفسه

كم من فرصة للحياه ضاعت على شابات
دفنوا نفسهن بالحيا كما يقول المصريين

اعلم ان الظروف الاجتماعيه قاسيه على الخليجيات ولكن هنا يكمن اقتناص
فرص الحياة والتحليق بالفضاء حتى وان كان التحليق على الوساده هم حلو
ها ها ها
الحافظ الله

Anonymous said...

با بنت اشاميه

اذا فات الفوت ما ينفع الصوت
هو يخفف شويه ..... بس ما يسوي شيئ
نصبر ونتحمل الواقع
والاجر عند رب العالمين

بو عبدالملك said...

انا امنيتي لو يرد فيني الزمن جان تمنيت اني اعيش على زمن المجاهد خطاب (سامر السويلمي)
او مع المجاهد عبدالله عزام

enter-q8 said...

امور كثيرة لو رجع الزمان لكنا طلبنا ان يتوقف عندها و لا يتحرك

DiLLi O MiLLi said...

*
*



لو عاد شريط حياتي ،،، لمحيتُ صداقة .. كانت

في مثل قديم يقول : زرعتها "لو" طلعت "ياريت"،،،،،ء






قدر ومكتوب






الحمدالله علي كل حال

بنت الشاميه said...

dm3t _almghor :

الحمدلله على كل حال
ودائما الخيره فيما يختاره رب العالمين
بس ساعات يتنمى الانسان لو غير شيئ فى وقت ما حياتي...او لو اتخذ هالقرار المعين ....او ..او.....او
ولكن الخيره لرب العباد
ولا تحسفين على قرارج ان شاء الله يهنيج فى عيالج ويتهنون وياج
وتشوفين خبرهم وبرهم فيج يارب

بنت الشاميه said...

BeeDoO :

الحمدلله ...انت وايد متثصالح مع نفسك
وهذا بحد ذاته نعمه الله يهنيك فيها

بنت الشاميه said...

Jako :

اذا مقتنع بالتغير لازال هناك وقت

بنت الشاميه said...

كويــتي لايــعه كبــده

يعني...؟؟؟؟؟
(:

بنت الشاميه said...

اجار الدين كشمش :

اول شيئ عيدك مبارك وتقبل الله طاعتك
وين هالغطه الطويله..؟؟؟
ان شاء الله على خير
وانتو ما تسقطون من حساباتي انتو الخير والبركه
الظاهر انك صرفت على هالرفيج وايد عسى ما تسلف منك ..؟؟؟؟ وصادك..؟؟؟
الظاهر انك مقروص واااايد
سوى خير وقطه بحر
((:

بنت الشاميه said...

Q8EL5AIR :

لا الله يخليك لا تودينا ورا الشمس
انا وحبيبات قلبي..؟؟؟؟؟؟
ترا الطوف تسمع
(((:

بنت الشاميه said...

الزين :

انت اللى عورتي قلبي وسلامه قلبج
وااااي ""اخيييين "" حسيت فيها من اقصى قلبي
جان زين الواحد بايده يغير اللى يبه
بس اذا ما قدر ..ابد لايتحسف عليه
وان شاء الله الخير بقبول وتراه وااااايد
لا تحترين والخيره فيما اختاره رب العالمين
والله يكثر من كانت معرفتهم ولازالت لك مكسب....انت تستاهلين كل خير
:*

بنت الشاميه said...

جبريت(عنيف سابق :

الحين انا اللى اسئل
وانت عليك الاجابه...ههههه

بس اجاوبك لو اصحا من النوم عمري 10 سنين اعيش نفس حياتي اللى عشتها
و ما ابي اغير فيها اي شيئ
والله وانا صاجه
(:

بنت الشاميه said...

Anonymous 1:

تعليقج كان جدا ممتع وعين العقل
والحمدلله على كل حال
والله يجمعكم مع بعض على خير مره ثانيه يااااارب

بنت الشاميه said...

star :

الله يخلي لج كل من تحبيه
ويديم الحب بينكم
الهم امين

تصدقين هذاهو الرضى
وهذا هو عين العقل
الله يتتمج فيه

بنت الشاميه said...

حسافتج يا كويت :

تعليقك خطير
ما عندي رد عليه
(:

بنت الشاميه said...

mob :

وعلي على القوارير اهم خلوا قوارير
القوارير صاروا من الرخام
):
لو تسوي وحده شيئ ...ما ينسونه لها ابد حتي لو تصير جده
خله تصير احلام على الوساده الخاليه على الاقل احسن لهاااا واحفظ
والله كريم

بنت الشاميه said...

Anonymous 2 :

نرا حتى الكلام يخفف من الضغوط
ما تشوفني مسميتها جلسات جماعيه علاجيه
والله رايح بمراده

بنت الشاميه said...

ابو عبدالملك :

وانا اتمنى لك ان تتقفه اكثر
قبل ان تعيش بينهم

بنت الشاميه said...

Enter-Q8 :

ان يتوقف الزمن هذا مستحيل
بس نغير من الزمن ولو القليل
اعتقد هذا ممكن
والله يكون بالعون

بنت الشاميه said...

DiLLi O MiLLi :

ان شاء الله تقدرين تنسينها
ماكو شيئ مستحيل
الله يعينج
ولهت عليج
(:

ميمة السبيت said...

** ايه والله ياليت يرد فيني الوقت و ادرس شي عدل مثل الناس اكو احد يدرس علم نفس ، ناس تخصصاتهم كمبيوتر و هندسة قاعدين بالبيت انا شكو دارسة هالتخصص البايخ مادري مع انه نسبتي كانت زينة والله بس يالله الحمدالله على كل حال

lilly said...

سؤال جدا قوي .. يحتاج تفكير

لو رد الزمن ورى أحتاج أعيد حساباتي بال 5 سنين الأخيره .. من قرارات و صداقات ومن كل شخص جرحته و ضايقته :)

AseeL said...

لو كنت علمت الغيب..
لكنت أكثر حذرا من نون النسوة..
وما كنت احتجت لأن أعيد ترتيب الأشياء



شفافية (سذاجة) قلبي..
مع بعضٍ من نون النسوة
بابيعها ابـ بسطة..
في شراي بنت الشامية؟

lawyer said...

انا دااااااااشه اطل عليج و اسألج اشلونج و عيدج مباااااااارك


:**


ولهتااااااااااي علي صح :***



ماراااااااااح اغير شي بحياتي
حتى وان كانت كلها عيوب و اغلاط و شقا و تعب


لكل منا قدر خليه يعيشه

احب حياتي بكل مافيها اكيد كثر التعب بيي فرح او احتسب هالتعب رفع درجات عند ربي



وبختار واقعي افضل من اني اعيش في لو و ياربت



ترا من صجي ولهاانه عليج :*

Anonymous said...

What happened to Um il Sa3af wil Leef? Aren't you friends or something?

بنت الشاميه said...

ميمة السبيت :

الحمدلله على كل حال
حتى علم النفس من العلوم الهامه الجميله المفيده
اللى ما يستغنى عنها الجميع
يعطيج العافيه

بنت الشاميه said...

lilly :

وهذه هى الفرصه ردى فكري وغيري اللى تقدرين تغيره....واللى ما يتغير
لا تتحسفين عليه ...تعايشي فيه
ويالله العافيه

بنت الشاميه said...

AseeL :

الحياة مدرسه نتعلم منها
ونقدر نغير فيها....بس اكيد مو بسهوله
بس نغير اللى نقدر عليه
فى الحركه بركه
لا خلا ولاعدم
(:

بنت الشاميه said...

lawyer :

فطيييييييم
ما اصدق انت وينج...؟؟؟
وين تغطين علينا...؟؟؟؟
صج صايره ياغالي يابو الموقه
ههههه
تقبل الله طاعتد وعساج من الفايزين والعايدين....كلنا بخير والحمدلله
بس ولهنااااا عليج وااااايد

و""بختار واقعي افضل من اني اعيش في لو ...و.... ياربت""" هذا عين العقل
الله يتممه عليج يارب ويبارك لج فيه
حتى انا ولهااااانه عليج
ان شاء الله كل شيئ تمام
((((:

بنت الشاميه said...

Anonymous 3 :

ما عندي اخبار عنها
ان شاء الله تكون بخير

Coffee said...

خوش فضفضه
شنو تبون تغيرون بحياتكم ؟؟؟؟
ما اختار أول واحد حبيته
وادرس بكالوريوس بامريكا

وهل فاتك وقت التغير ؟؟؟؟؟
أو
لازال هناك كثير من هذا الوقت ؟؟؟؟؟
الاول فات فات وبيدينه سبع لفات ههه بس غير مأسوف عليه
الثاني عوضته بدراسة الماجستير