Tuesday, July 07, 2009

هلا شققت عن صدره

أبو صالح و أبو راشد قاعدين يطالعون الأخبار
في بلدتهم بريدة في القصيم.
أبو راشد :
وش قاعد تفكر فيه يا بو صالح؟
أبو صالح : أفكر بهالدين العظيم اللي انتشر
من أقصى الأرض اللى أقصاها
ناظر هالمسلمين الصينيين
ابو راشد : و الله أنك صادز (صادق) يا أبو صالح

ابو صالح : بس ترى هذول ما يعرفون من الدين
الا القشور طبايعهم زي الأجانب، بس يصلون
المسلمين الصدز هم العرب
اللي يفهمون القران و الأحاديث
ابواشد : و الله أنك صادز يا أبو صالح
ابو صالح: و بعد ترى موب كل العرب مسلمين
صحيحين عندك هالشوام و المصاروه و المغاربه
و الله حتى ما يصلون صلاة ربي
ان بغيت المسلمين الصدز تراهم
أهل الجزيرة و الخليج
ابو راشد : و الله أنك صادز يا أبو صالح
ابو صالح : و موب بعد كل الخليج ترى كل
هالدول تسمح بالخمر و بالكنايس
الدين الصدز هو ديننا حنا يا أهل السعودية
ابو راشد : و الله أنك صادز يا أبو صالح
ابو صالح : بس عندك بعد أهل الشرقية حريمهم
ما يغطون ووجيهم، و أهل الغربية حريمهم
بعد ما يتغطون و يشيشون
و أهل الشمال حريمهم ما يتغطون عن رجالهم
و يجلسون معهم و يضيفوهم
و أهل الجنوب مثلك خابر عندهم بدع واجد
الدين الصدز موجود هنيا عندنا
في الوسطى و القصيم
ابو راشد : و الله أنك صادز يا أبو صالح
ابو صالح : بس ترى عندك هنا في الوسطى الناس
يتتنون (يدخنون) و يسمعون موسيقى
و العياذ بالله الدين الصدز هنيا ببريده

ابوراشد : و الله أنك صادز يا أبو صالح
ابو صالح : ببس بعد بريدة موب كل حارة زي
الثانيه ترى أكثر أهل بريدة مركبين دشوش
و يشوفون القنوات الماجنة
ما فيه مثل حارتنا ولا دش واحد
ابو راشد : و الله أنك صادز يا أبو صالح

ابو صالح : بس الله يهديهم الجيران موب دايم
تشوف عيالهم في المسجد، و لا تشوفهم
دايم في صلاة الفجر. الصراحة يا بو راشد
ما فيه في الحارة يصلون الفجر دايم في المسجد
الا أنا و انت

ابو راشد : و الله أنك صادز يا أبو صالح
ابو صالح : بس أشوفك يا بو راشد هالأيام
ما تخشع زين في صلاة الفجر
!!!!!!!!!!!!!
هذى هى مشكلة الإسلام .....كل من ينظر إلى
إسلامه إنه هو الأصح والأعمق
والأهم.... سوء الظن فى حسن إسلااااام الأخر
عن قصد أو من غير قصد
هذه هي البذرة اللى تزرع الإرهااااااااب
وهذا هو الجو الحااااااضن له
اللهم أبعدنااااااا عنهم
وإعدهم إلى طريق الهدايه
وجعل قول رسول الأمه
هلا شقتت عن صدره....... قدوتهم
اللهم أبعدنا عن سوء الظن بحسن إسلام الأخربن
واللهم أبعدنا عن الإفراط والتفريط

اللهم امين
وسلااااااااااااامتكم

41 comments:

أهل شرق said...

لكم دينكم ولي دين

والكل بيرتاح

ikhalifa said...

و الله إنج صادزة

:)

Anonymous said...

شكرا للتنويع يوم اغنية ويوم حديث

جبريت said...

الصدز بعينه وعلمه كفر العالم باقل من عشر دقايق وصار اهو المسلم الوحيد

Nikon 8 said...

بوصالح ضاقت الدنيا بعينه وما لاقي غير روحه اللي إسلامه صح
:)
وبوراشد مع إنه موافق بوصالح على طول وهمن ما سلم منه
!!!!
صباح الإسلام السمح
قصة حلوة
:)

الزين said...

والله انتس صادزة

:)

يازينتس وزين كلامتس

وصباحج عسل

:**

Eng_Q8 said...

وايدعجبني البوست

خصوصا في مسألة الانتقائيه .. هذا ان دل فانه يدل لعدم قرائتهم للتاريخ واعتقد بان اغلب ما كانوا يفعلونه سابقا اصبح محرما بقدرة قادر

تسلم ايدس

سبمبوت said...

استمتعت بكل كلمة .. لإن الحقيقة تطل منها بلا غطوات :)

سالفة قلب said...

صباحتس خير ياوجه الخير

والله انه بوصالح حقنه
و مير بَه علةٍ في قلبه
واظن انه بوراشد طاقتن تسبده
بس انه يجاريه

حال بوصالح حال هالناس النقاده
شاطرين بس يشبون السعيره
ويتطمشون

البقرة أضنت،والتيس أعرس،والبيض فقّس
واحنا بس انتطاحن

لو فيه خير تسان ماعلك هالناس
ولفظهم


خوش بوست وانا اختس
ترى قلبي تخرق عليج

:**

beezo said...

صباح الخير

تبين الصدزز؟؟

اللقافه والتدخل بشئون الغير اهم اللي ذابحينا

ومثل ماتفضل واحد من الاخوان

لكم دينكم ولي دين


بس ماكو فايده اللقافه بدمنا

esTeKaNa said...

صباح الورد
:)
والله انج يا بنت الشامية صادزه

واي اسمحي لي اتحلى على سالفة قلب
تعليقها يونس
جميلة جميلة هالبنت
:)

ARTFUL said...

لوووول


حلوه


:)

وسيشهد said...

كلام جميل ذكرتيني

برمضان إللي طاف لما تداعت ٥ كنائس في أمريكا في العشر الأواخر للصلاة لدعوة الرب لهداية المسلمين في أيامهم المقدسة للدين المسيحي !! هذا هو التسامح

و أحنا ربعنا من تخلص الصلاة و يبلشون يدعون على الكل اللهم دمرهم اللهم شتتهم ،، انزين ليش ما نقول اللهم إهديهم لدينك ؟؟؟

سالفة قلب said...

استكاانه

ههههههههههههه ياحبيبتي انتي
مادري ليش عقب ماقريت تعليقج رحت اشوف روحي بالمنظره
:))

الزين said...

لوووووووووول


مت من الضحك على تعليق استكانه وسالفه

:)

بنت الشاميه said...

أهل شرق :

الله الهادي

بنت الشاميه said...

ikhalifa.com :

الصدز... يعور
قمت اتعلم لهجات
(:

بنت الشاميه said...

Anonymous :

التغير مفيد..؟؟؟

بنت الشاميه said...

عنيف :

لا حول الله ولا قوةالا بالله

كل من صدزه على كيفه

بنت الشاميه said...

Nikon 8 :

صباح الوسطيه والاعتدال بكل شيئ
وحسن الظن باسلام الاخر وقبوله

بس ما نقول الا الله الهادي
منورتنا

بنت الشاميه said...

الزين :


صباحج زين
والزين كله عندش

طماشه بو صالح....والكثير
منا مثل بوصالح
والاكثر الاكثر من طقة بوراشد
السلبي المسالم الصامت

و يالله العافيه

ReLaaaX said...

ماعليج يابنت الشاميه آنا بصدد إني اخترع لكم مبيد للناس هذي عشان انقذ البشريه من شرهم

--> ترى الجمله متعوب عليها ;p


هالحديث يبجيني
لأن الصحابة كلهم تضايقو عقب اللي صار خصوصا ان الرسول يوم سمع عن هالشي قال قاتلهم الله !؟
والصحابي مااذكر منو بس كان يحاتي شراح يسوي لو كان فعلاً هالريال اسلم من صجه مو عشان السيف !

تخيلي


والناس الحين تمشي وتحكم من كيف امها
الناس اللي جذي اللي يمشيهم هواهم مو عقلهم

شي يناسبهم سواء من الشكل او الكلام او اي شي امدحو فيه ووصلوه السما

وشي مايعجبهم لأي سبب من الاسباب صار فاسق وفاجر


يبا لو بس نشوف عيوب انفسنا ماراح يصير عندنا وقت نحاسب الناس على اعيوبهم وزلاتهم

BeeDoO said...

وراثتنا للدين لا تعلمنا فهم الدين الصحيح .. لذلك الكل يرى من جانبه بأنه الأصح لأنه لم يعرف الا دينه ولم يفهم الا ملته لذلك ينحاز على ما هو عليه

عجبتني الفكرة والبوست

سالفة قلب said...

الزين

ههههههههههههههههههههه

شفتي استكانه واهي اتحلى علي

هذا وانا اتحجى قصيمي.. عيل
لو تسمعني وانا اغرد بالسريلانكي اشبتقول

The.One said...

الواحـد خـل يهتـم بأموره قبل لايهتـم بامور الناس


خوش حوار وخوش بوسـت
:)

بنت الشاميه said...

Eng_Q8 :


الله يسلمك ويخليك

مسكين ما طلع من بريده
وما شاف المسلمين الباجين الا من خلال التلفزيون .... وبعد يقيم دين الاخر ووووووين.... بالصين

هذه هى مشكلتنا
اللهم نسالك العافيه

بنت الشاميه said...

سبمبوت :

هذا هو الصدز.....الله يسلمش
ويخليش....مشكوره

بنت الشاميه said...

سالفة قلب :

هلا بالغاليه...الله يعافى بوصالح اللى خلناااا نشوفش....ونفرح بش
ونسمع حسش...ويابختنا بش
مت من الضحش....حقنه....من وين متطلعنهاااا...؟؟؟؟؟؟

والله لج فريه ماتصدقين شكبرهاااا
من صج ضحكت وانا اقرا تعليقج
اصلا يبيله مترجم....هههههههه

وصاجه والله استكانه لما قالت هالبنت
جميله جميله
لا تطولين علينااااا ... كلنا نحبش

بنت الشاميه said...

beezo :

هى بس اللقافه
والتنظير وين راح
والمعرفه بكل شئ من الابره الى الصاروخ
اللقافه تطلع ولا شيئ
):

بنت الشاميه said...

esTeKaNa :

مساء الورد يا استكانتنا
عاد تبين الصدز تعليق سالف قلب
احلى من البوست بكبره
والله لها فريه
حياكم الله كلكم

بنت الشاميه said...

ARTFUL :

شكرا اخي العزيز

بنت الشاميه said...

Alsager :

هالايام هناك برامج توعويه
وحملة يقوم بها شيوخ دين افاضل
يطلبون الوسطيه والتسامح مع الادبان
و يكون الدعاء للاخرين بالهدايه
وليس بالدعاء عليهم
والله الحافظ

بنت الشاميه said...

سالفة قلب
esTeKaNa :
الزين :

والله كلكم تردون الروح
يااااا حبي لكم
:**

Anonymous said...

المشكله بطريقة التفكير

مو بس بالدين

حتي بالفكر والرأي والاعتقاد والغاء الاخر

فمن ليس معي فهو ضدي

ياله السلامه

بنت الشاميه said...

Blogger ReLaaaX :

اهلا بعالمتنا الجديده
بدل مبيد بشري...نبي الله يخليج مبيد محبه واخوه وتعاون.... مهما كان اختلافنه مع الاخر ...و الاهم قبولنا
للاخر واحترامه
واحترام انسانيته قبل جنسه او نوعه او مذهبه او ديانته

ما اقول الا يالله العافيه
مشكوره على المجهود المتعوب عليه
:**

بنت الشاميه said...

BeeDoO :

دينا الاسلامي الحنيف سهل وواضح
المشكله فى التطبيق
ولاننا بشر فنصيب او نخطأ
وهذه هى المشكله

يالله العافيه

بنت الشاميه said...

سالفة قلب :


تبين الصج تستاهلين من يتحلى عليج

اما لهجة القصيم تروالى انها اصعب
من السيرلانكي
ههههههههههه

بنت الشاميه said...

The.One :

اهم فاضين ما عندهم شغل الا مراقبه ومحاسبة الاخر
لانهم عند انفسهم كاملين والعياذ بالله
والكمال لله وحده سبحانه

بنت الشاميه said...

Anonymous :

فمن ليس معي فهو ضدي

منطق غريب دخل علينا....واستحوذ على تفكير الكثير
هذا هى اول خطوات التطرف
متى ما تخلصنا من هذا المنطق
سيكون قبولنا للاخر سهل وسلسل
ونكون بخير وعافيه
والله الحافظ

Haneen said...

إبداع
السهل الممتنع و
to the point
تسلم ايدياتتس

بنت الشاميه said...

Haneen :


صدز......ويسلم من قال