غربــــــــــــة زمــــــــــــن

أحاول أن أفهم ما يدور حولي وأحاول أن  أتقبله كما هو  وأتعايش معاه 

 ليسهل علي التعامل مع هالتغير الشاسع بحياتنا

وأحاول أخطي هالفجوه الكبيره بيني وبين بعض شباب هالجيل

يمكن ... ما أقدر ألحق عليهم  لإنهم أسرع مني ومن قدراتي

وهذا ما لا  أعتقده أبداً

لما تحاورهم تصل معاهم  لطريق مسدود لإختلاف الفكر وإرتفاع سقفه

كله مستعجلين  ماعندهم وقت لقراءة التفاصيل وفهم ما بين السطور

ولا يحاولون حتى أن يسمعون لك

وأسرع ما عندهم  إلقاء التهم  جزافا لأنك خالفتهم

 وأحيانا كلمات خارجه عن الأدب والأخلاق الحميده

ماعندهم الحجه ولا المعلومه الصح معتمدين علي المعلومه المتناقله فقط

محد عاجبهم ولا تارس عيونهم ويبون يغيرون الأوضاع كلها علي كيفهم

وجان زين عاد أهم قدوه فى دراستهم أو فى عملهم علشان الواحد يثق فيهم 

فاحترام نفسي وفكري.... واتوقف عن النقاش

والمصيبه يفهمون إنهم أفحموك

لأني تربيت علي قيم ومبادئ التي لا تتجزء ولا أستطيع أن أحيد عنها

أو حتى أغض الطرف أوأتغابى أو أتجهالها

  جيل"البعض منه" تنقصه الخبره والتجربه ومشكلتهم الثقه الزايده بأنفسهم

والاستهانه أحيانا بمن  أكبر منهم  والتطاول عليهم ولا  يثمنون كلامهم

 هالأيام  يمتلكني إحساس قوي إني أعيش بغربه ووحشه

ماأدري إهي غربة مكان والإ غربة زمان  

أو غربة روح ...أو هي غربة فكر ومبادئ وقيم

  فعلا  أعيش غربه بين الأصحاب والأهل والناس

حوارات وايده  ما تعجبني ولا أقدر حتى أرد أو أعلق عليها

والصج انها ما تعجبني وما لي الا  الصمت والسكوت

لإنني متأكده ما أقدر أقنعهم أو أُعدل ولو القليل من إعوجاج فكرهم 

وكل الناس عندهم فاسدين وحراميه ...الإ  هم  و ربعهم

وفوقه  يتهموني أحيانا بالنظره السوداويه  واني غير عمليه

مع إني بالحقيقه أكثر إنفتاحاً منهم وإطلاعاً

ولهذا أختلف معهم

ماأقدر أمحي شخصيتي  وأتقمص شخصية ثانيه علشان أجاريهم

تصرفات وسلوكيات وايده  أرفضها رفض قاطع

وأحيانا تغضبني وتزيد من ضغوطي النفسيه

  أحاول أدور عن الأسباب ليش وصلنا جذي

يمكن لإن  الأب والأم  فقدا  دورهما الريادي بالإسره

والإ يمكن المدرسه ما صار لها دور أو تاثير بالتربيه والتعليم

والإ  من كثرة الدلع والتدلل  

والا  هو من  التسيب وكثرة الإهمال وقلة الإحترام  

أو من تمردهم على أوضاع..... ما تعجبهم

دخلت علينا كلمات وتعبيرات غريبه ...ما سمعناها من أباءنا ولا من أجدادنا

وصارت ترددها  بعض الأمهات والأباء  وااايد
يمكن انا اعتبرها هي من أهم  الأسباب اللى قاعد يصير فينا

مثــــــــــــال

هو يبي جذي....وهذا إختياره

أنا ما أقدر عليه أو عليها

بشتري راحتي وبفك رأسي من العوار

ما علي منهم ..... الأيام تعلمهم

ما عندي وقت وراي ألف شغل ..ما أتحمل حنتهم

ربعه مو أحسن منه كلهم عندهم ....الإ هو

والا هي فتنة العيال...وما يشفون عيوب عيالهم

 الناس  صاروا مختلفين ما يرضون إلا بصورتهم  في زمن السطحية والتفاهة

لذا قررت أن أنزوي بروحي  ولو قليلا  وافضل الوحده

 وأعيش بغربتي بينهم

علشان يالله  أقدر أكمل معهم

أو أحاول مسايرتهم وأتحمل أفكارهم

لإن محد مستعد أن يسمع أحد ... الإ صوته هو بروحه

فاللهم ارزقنا سعة الصدر وطمأنينة القلب وهدوء البال وراحة الأعصاب

وقوة الإحتمال وصبر أيوب

والهادي من هداه ربه

وسلاااااامتكم