Monday, December 20, 2010

مغازل بحريني... تعرفونه..؟؟؟؟

بعض الريايل والعياذ بالله يبون تندب "قنبله "مو رصاصه
بعيونهم من خز الحريم والبنات وكل ماهو متحرك حلال
اقولهم واوصيهم خل يحطون بالهم لا يصيبهم ما أصاب  
شـــــــــــــــــــــــاعرنا البحريني الاستاذ حسن ‏القرمزي ‏
 *********
غزاله من صدد مرّت وأنا مسمّــــــــــر بواديـــــــــــها
‏خذت قـــــلبي بمشيتها وتمنيت ‏إني أتقرّب واحاجيـــها
وخفت من الفضيحه تصير في الديره وتغربلني بلاويها
وأحصّل ‏ليّه جم طراق وجم رفسـه ويعادوني أهالـــيها
وتميّت أخزي الشيطان وأتعوّذ .. لكن ‏خاطري فيــــــها
غلبني ابليس ووسوس لي وقللي يالمدمغ لا تخليــــها
مثلها وين بتحصّل ‏خســاره .. وإذا فاتت ما تلاقيـــــها
‏جرّب واقترب منها وتنــــــــحنح وابتسـم ‏ليـــــــــــــها
إشــــــــــــــاره عطها بعيونك ومو لازم تحاجيــــــهــا
********
‏وهيه تفــــــــــهم إذا تبغيك ‏وتدري بيـك شاريــــــــها
ترد ليك الإشــــاره بنوب وإذا تبسمــــــت حاجيـــــها
‏واذا ما ليها ‏خـــــــاطر فيك وما تبغيـــــــك خليّـــــــها
وتباعـــــد عنها لا تبليك بلوى وانتـــــــــه تبليــــــها
خزى ابليس ‏شجعني وخــــــــــــــلاني اجاريــــــــــها
ومن زرنوق الى زرنوق ألاحقـــــــــــها واماشيــــها
وصممت إني أواصل ‏واشـــــــــــــوف شلون تاليـــها
‏أما فــــــــــــــــوز بالتفاح والجنـــــــّه وما فيـــــــــها
‏ولاّ شتم ‏وطراقات ومعـــــــــــــــــــــادى أهاليـــــــــها
وتم ابليس يشــــــــــــــجّعني ويخليني أدانيـــــــــــها
*********
‏ويقل لي من ‏ورا الغشوه حـــلاوه ما احلمت بيـــــــها
‏ولو تكشـــــــــــف الغشوايه حشاك اليوم ترويـــــها
تشوف ‏عيون خضراوات والكحلــــــــــــة أصل فيـها
تشوف خدود تتلامع وســـــن الذهب حاويــــــــــــها
تشوف الخشـــــم ‏سلّة سيف والبسمه بمحاجيـــــــها
تشوف الشـــــــــعر عرف الخيل يتمايل حواليـــــــها
وأتردد وأخزي ‏ابليس وأذكر غضــــــب باريـــــــــها
ويرد ابليس يوصــــف لي محاسنـــها ومحاويـــــها
ويوم إنه ترس ‏مخـــي وذابت مهجتـــي فيــــــــــها
*********
صرت مجبــــــور ألاطفـــها ومجبور القلب فيـــــها
ويــــومٍ وصلت ‏الخبّـــــاز وعيوني تباريــــــــــــها
وناديت بضعيف الصـــوت قصدي بس أحاجيـــــها
عطينا وجــــــه ‏يالبـــــدره ولا جني أحاجيــــــــــها
قلت وشــــدعوى يالقاسي فداك الروح جرحيـــــها
******
وقلت يمكـــن ضعيفة سمـــع أتقـــــرّب وأناديـــها
دنيت منـــها وأنا مرعــــوب خايف ويش ‏تاليــــها
ولا قالـــت لي تباعــــــد وانا اللي لاصــــقٍ فيــــها
حاجيني وردي الصـــوت وروحــــي لا ‏تعذبيـــــها
يانجم سهــــيل في ظلمــه وفي عتمة دياجيـــــــها
سحـــــرتيني ذبحتينـــي وهـــذي الروح ‏ناغيـــــها
ورفعت لي "الغشــــوايه" قلت بنظـــــر محاجيــــــها
أثاريــــها "أم لعيـــــال" وانا طايح غــــــزل ‏فيــها
صـــــدق من قال في الأمثــــال حاميـها حراميـــــها
*********
تهقواااااان شنو صار في شاعرنا بعد هالتحرش
الله لايحطكم مكانه ...والا تبون تجربون..؟؟؟؟؟؟ 
حطوااااا بااااااالكم .... وقد اعذر من انذر
وسلاااااامتكم

16 comments:

ابن السور said...

النفوس تختلف وهي امارة بالسوء
وهذا الشاعر قدم لنا في شعره
عن نفس سيئة
كان اولى بها ان تكون طاهرة في حبها وعشقها .. شيء رائع ان تكون معشوقتك
هي مملكة قلبك وبيتك معا
عندها تملك قلبها كاحساس وود
وفكرها بان تكون لك وحدك
كاتبة رائعة

الزين said...

لووووول

اكيد انطق طق سنه بساعه

صباحج عقد مغزول بالياسمين

:**

Enter-Q8 said...

ما صار شي كتب هالشعر و زاد غلا ام العيال عنده
كلش ما تدورون الشاره

عثماني said...

اعتقد ان انكفخ ببطل ماي لقاح عقب عملته السودة

:)

t7l6m.com said...

الله يعينه على الغسله

Anonymous said...

صح لسانك

Amwaj said...

لوووول
ما تسوى عليه

يا حلوج يا بنت الشامية ويا حلو بوستاتج :)

الجودي said...

العين ما ترمق الا حلال



مشكورة

:)

بنت الشاميه said...

ابن السور :

طبعا النفس اماره بالسوء
و الشاعر اعطنا درس و نصيحه موعظه
للرجل العينه زاااايقه
حتى لا يقع بالمجظور

شكرا لك وحياك الله

بنت الشاميه said...

الزين :

وعلي عليها الحين بيقولها الف عذر وعذر
وبتصدقه المغروده
من يقدر عليهم
يدخلونج منيه ويطلعونج منيه

جان زين تدبغه
لووووول
انا وايد عدوانيه اليوم
تصبحين على خير ياشيخة البنات

بنت الشاميه said...

Enter-Q8 :

ممممممممم ما اقدر اعاسرك
كلامك صح
لووووول

بنت الشاميه said...

عثماني :

وعلي عليها
حريمنا ما يطقون
بس يصيحون ويبجون
ويسكتوووووون بالاخير
من يقدر عليكم

بنت الشاميه said...

t7l6m.com :

تهقى تقدر عليه
لووووول

بنت الشاميه said...

Anonymous :

وصح من قال

بنت الشاميه said...

Amwaj :

والله انت الاحلي
قلت تغير وتلطيف للجوالخانق بالديره
مشكوره

بنت الشاميه said...

الجودي :

الحين اختلط الحابل بالنابل

حياج الله