Friday, June 26, 2009

ريحة الحبايب

أمي الله يحفظها كل ماطلبت مني أيب لها
دفتر تلفوناتها بتدق على أحد من أهلها أو ربعها
كله أضحك بقلبي....وعلي على أمي نص الأرقام
اللى بدفترهااا متوفين وانتقلوا إلى رحمة الله
اللى له سنه واللى له سنوات
وسألتها مره يمه ليش ما تشطبين كل هالأرقام؟؟
جان تطالعيني بهذيك النظره اللى عورت
أقصى ما فى قلبي
إبنيتي شلون تبيني أشطب حبايب قلبي من قلبي
هذول أهلي وصديجات عمري حتى لو توفوا
ويا ابنيتي اللى خلف مااااا مات
صج إنهم توفوا ولكن أنا أدق على عيالهم واسئل
عنهم واوصلهم وأودهم وأسمع شكواهم وأسوي
لهم اللى ربي يقدرني عليه
عيالهم عيالي و فيهم ريحة الحبايب
أفا عليج يا ابنيتي شلون أشطبهم من قلبي..!!!ْء
هذا طريج كلنا بنمشي فيه ومحد دايم غيره
سبحانه الكريم الأكرم
وبيي اليوم اللى أنا بصير بعد رقم بدفاترهم
بس اوصيج الحي منهم لا تنسونه إسالوا عنه
إوصلوهم ... زوروهم ....... ودوهم
وما أدري عاد بعد عن عيالهم بيشطبون رقمي
والإ ...لا ....؟؟؟؟؟؟؟؟؟؟
اللى بيحاسبني ربي عليه أنا بسويه لهم
والباجي على الله
وإيي اليوم اللي أحس بأحاسيس أمي الله يحفظها
وافقد نااااس أعزاء على قلبي فارقونا إلى الأبد
ويصيرون مجرد أرقام فى موبايلي
شلون أقدر أمسح أرقامهم....وشلون أقدر أنسااااهم
صج إحساس صعب ما يحس فيه الا اللي يعانيه
ومحد دايم غيره سبحانه وتعالى
فاللهم ألهمنا الصبر والسلوان على من فقدناهم
فهل هذا أقل وفاء لهم...؟؟؟؟؟؟؟
وسلامتكم
اللى اثار شجوني مدونة يوميات انسان بسيط

28 comments:

Anonymous said...

الله يحفظها الوالده

فيها خير ...أصيلة


هذا الطبع الي ينقال على راعيه أصيل

الأصل مو بالنسب

بالوفا مثل الوالده

لله يخليها لج

Mohammad Al-Yousifi said...

موضوع مؤثر و يجعل الواحد يعيد حساباته

الله يطول بعمر الوالدة و يرحم اللي راح

أهل شرق said...

الله يحفظكم ويطول بأعماركم ويخلي لكم

اميمتكم ..

والمعدن الاصيل مايتغير لونه

ARTFUL said...

الله يحفظج ويحفظ الوالده ويخليها لكم


:)

NewQ8 Bride said...

الله يحفظها و يخليها لكم انشالله يا رب تينن اسم الله عليها

Anonymous said...

أختي الكريمة

بوسة اكبار واجلال على راس الوالدة الكريمة من ولدها

هذا هو وفاء الأولين

هذي هي قيمة صلة الرحم عندهم

الله أكبر ... ما ينتهي الوصل بموت اللي تعرفهم ... هي حفظت صلة رحمها فيهم عن طريق وصلها بذريتهم

الله يحفظها ويعطيها الصحة والعافية ويحفظج والأسرة الكريمة

أن واجهت نفس الموقف مرات عديدة

آخرها ... عمي رحمةالله عليه

كنت على اتصال به اينما كان

بعد ما مات ... احتفظت برقمه الخاص

بدون أي نية اني استخدمه ... بس كنت احتفظ فيها بسبب عدم قدرتي على مسحه

كنت قريب منه .. وكان هو قريب من الكل



الله يرحمه ويغمد روحه الجنة

يمكن اليوم اهي ارقام هواتف

بس باجر ... بتكون أثر من آثار من يأخذ الله أمانته


قلبتي المواجععععععععععععع :(

جبريت said...

الله يحفظ لج الوالده ويطول بعمرها

تفكيرها مثل تفكيري ولد خالي من 3 سنوات متوفي لما الحين ما مسحت رقمه ولا حتى عدلت الاسم وخليته بإسم خالي ابو المتوفي احس انه غلط اذا غيرته او شطبته

Anonymous said...

الله يحفظ الوالده ويطول بعمرها

هالجيل مايتعوض ,اهم ريحه وملح الكويت

عسانا نتعلم منهم ونحافظ علي سلكهم

عندي 3 ارقام بالموبايل لمتوفين مستحيل امسحهم

اجار الدين كشمش said...

الله يهديج ب الشاميه

لا حول ولا قوة الا بالله

مووو وقته

فمالله فمالله فماالله

فمالله

kazmawy said...

الله يحفظها ويرزقها طولة العمر والعافية :)

tabbebek said...

خوش موضوع واسلوبك في الكتابة جميل

حسافتج يا كويت said...

ربي يعطيها طول العمر والصحة وتشوف إعيالج معاريس وتشيل إعيالهم

بنت الشاميه said...

4 :

شكرا لهذا الكلام الجميل
افضال اتوالدين كثيره وعديده
عسى الله يقدرنا على رد جميلهم علينا

ما قصرت

بنت الشاميه said...

ma6goog :

الله يسلمك ويخليك
لازم نعيد حسابتنا بكل وقت
والله يرحم الجميع

بنت الشاميه said...

أهل شرق :


الله يحفظك ويخليك لاهلك
هذا جيل تعلم يعطي وما ياخذ
واصلا ما ينطر من احد شيئ
جان زين نصير لو ربعهم
مشكور

بنت الشاميه said...

ARTFUL :

الله يحفظك و يحليك

مشكور

بنت الشاميه said...

New Bride :

مشكوره يابعد عمري الله يحفظج

بنت الشاميه said...

دروازة :

ترا بقول لك سر
قريت على امي اللى كتبته عنهااا
وقالت ليش فضحتينى عند ربعج
وتقولك مشكور وماقصرت على هالحجى الزين وترا بوستك وصلت
هههههههه
وانا اسفه على تقليب المواجع
والله يرحم عمك ويرحمنا ويرحم
كل امواتنا واموات المسلمين
اللهم امين

بنت الشاميه said...

عنيف :

صج هذا اصعب شيئ
شلون نقدر نمسحهم وهم جزء من انفسنا
الله يصبرنا ويعينا
ومشكور وما قصرت عسى الله يحفظك يا رب

بنت الشاميه said...

Anonymous :


نتمنى من الله ان يقدرنا ونسلك سلوكهم ونتعلم منهم ولو القليل
هم قدوتنا بالحياة
والله يعينا ويصبرنا على من فقدناهم

بنت الشاميه said...

اجار الدين كشمش :

يعنى انت ما عندك ارقام ...؟؟؟

هذا هى الحياة...لله يعينا على من فارقونا ويرحمهم برحمته الواسعه
هذى الدنياااا

بنت الشاميه said...

kazmawy :

مشكور
الله يخليك ويحفظك يا رب

بنت الشاميه said...

طبيبك :

مشكور هذا من حسن ذوقك

بنت الشاميه said...

حسافتج يا كويت :


امين يارب العالمين

الله يسمع منك....مشكوووور

فريج سعود said...

فيها الخير الوالدة

AuThoress said...

الاسم والرقم في الهاتف و الايميل.. دون صاحب .. اكثر ما يؤلم الروح


الفقد

بنت الشاميه said...

فريج سعود :


مشكور وما تقصر

بنت الشاميه said...

AuThoress :

كلامج صحيح
بس هذى سنة الحياة
ما عندنا الا نعيش وياهم بذكريااااتنا
اسعدني مرورج