Wednesday, March 11, 2009

شلووووون نصير مثلهم....ومتي..؟؟؟؟؟







كنت كاتبه عن عشر نساء الأكثر جاذبية
بعالم السياسه العالميه فلما قريت عنهم
لقيت ان أسباب شهرتهم تنحصر فى أن

أغلبهم من أُسر غنيه ووو ثريه
أو وصلوا من خلال أحزابهم السياسيه
أو من خلال شهرة أزواجهم
أو كانت مشهوره....ملكة جمال...ممثله
بطله رياضه عالميه او عارضة ازياء

الحين إذا أنا إبي أصير مثلهم شسوي...؟؟؟؟؟
أولا
المال ....إذا إذا عندنا .... يالله نعيش فيه زين
وندرس عيالنا عدل ونامن مستقبلهم ونزوجهم
وأشووووووف أحفاااااادي...يااااا حلاتهم
بموت عليهم من الحين
ثانيا
الأحزاب....ما عندنا أحزاب وأصلا غير مصرح لها
لها يمكن هذا الطريق الوحيد اللى ممكن

ممكن أن أصل من خلاااااااله
بجدى وإجتهادي وبذراعي....هذا فلست منه
ثالثا
أما عن طريق زوجي فهو كويتى عادي موظف
مو سياسي ولا مشهور ولا مسجون
بس كويتى... يتحلطم وينتقد الوضع

ويتكلم بالسياسه وايد عاااادي كويتي
رابعا
أما عن الشهره...فملكة الجمال ...هههههه
الجمال والحمد الله موجود بس اللى رادنى
إنهم ما يلبسون اللباس الشرعي بالمسابقات
فهذا اللى رادني بس
اشوه لقيت لى مخرج بذكاء وفطنه
والتمثيل ما عندنا بنات تمثل.......لوووووول
والله احب التمثيل وهو فن راقي
بس وين ..؟؟؟؟ محد يتفاااااهم او يتناقش
أما الرياضه والله كنت أحب الرياضه وخصوصا
الجمباز وكل سنه أسجل بالفريق.....بس أمي الله يهداها
كله تزفنى اذا كان هناك تأخير بعد الدوام المدرسي
وما يصير نص سنه الإ المدرسه مسكتني الباب
ههههههههههههه
اماااا عرضة أزياء......هههه فنسنى احسن لنااااا
الحين شلون نصير منهم....كل البيبان مسكره
عندكم أفكار أًخري.....لو سمحتوا علموني
والإ بس أرضى بالواقع
والله محتره على مستقبلي حرام يضيع عندى طاقااااات
سياسيه وإجتماعيه مدفووووونه....أبي أطلعهاااااا
والإ كالعاده حريمتتتتتتتي
وسلاااااامتكم
*******
******
خاااااارج البوست

شفتوا العرض العسكري...؟؟؟؟
شفتوا السيارااات الخاصه اللى بعد العرض
هذول اللى يحجون عنهم بالتقرير إياااااه
هااااا.... متى بيحلووووونه....؟؟؟؟؟؟؟

39 comments:

الزين said...

عزيزتي المدونة

انتي في طريقك الى الشهرة

لقد كسبتي اللوتري الأنجليزي

@@


شدراج تصير ترى

وتصيرين مشهوره

وتحققين احلامج بفتح اول قناة تدوينية

وانا اسوي لج قصه طووووووويله عريضه عن كفاحج بالحياة

ونسميها كفاح بنات مضارب الشامية




اييييييه

احلام اليقظه حلوة

:*

مساج الله بالخير حياتي

الزين said...

هيااااااااااااااااا


وانا الأولى

شكلي نايمه بمدونتج يا الشيخه

خلاص عزلوا دار عندكم في بيتكم

هههههههههههه

Blog 3amty said...

معقولة حاطة صورة سويرة، ومو حاطة صورة عمتي !

حسافتج يا كويت said...

بنت الشامية



لقد أغفلت أنك مشهورة في عالم المدونات

ومع الإستمرار الصحيح في هذا العالم سينقلك لباب الشهرة

ترى إنتي مو شوية بين المدونات بس إنتي اللي ماتعرفين قدرج والله

nanonano said...

بنت الشاميه

هاهاهاهاهاهاهاها

هاهاهاهاهاهاهاها

والله أني فكرت في المدونين و المدونات كلهم لما شفت السيارات

خبري خبرج

nanonano said...

و بعدين ليش تبين تصيرين مشهوره و سياسيه؟؟؟؟

خلّج جذي مثلنا..قول يا لساني و أقول أحسن

تراوالي

لأن على أفتراض أن الله وفّقج و وصلتي

لج خلق واحد من أشكال نوابنا البايخين يلسّن عليج؟

اجار الدين كشمش said...

اطمأني ...يابنت الشاميه

مثلك كثيرات

هل الكل يعرف زوجات هؤلاء

, ديجول رووزفلت موسليني , غاندي عمر المختار
عاجل بالكويتي الفصيح
تشرشل ,مبارك بن صباح تشارلي شابلن
امبراطور اليابان ,

اسماعيل ياسين, القصبجي المتين,عبدالسلام النابلسي

كل هؤلاء وراهم نساء عظيمات
محد يعرفهن ولاهن مشهورات ولاشي

لكن كل جذي انتن يالكويتيات

بس شفتوووا تريزا جعجع

وجسمها البايخ شبت فيكم الغييره

مثل ماقالج مبيوق جابلي مدونتج و قعدي في مكتبتكم ...وكمبيوتركم وافيدينا

ببوستاتج المتنوعه الغير ممله
والي المزيد انشالله

فمالله

ANGEL HEART said...

للاسف قلتيها ياعزيزتي بنفسج كل االابواب مسكره

هذيل حياتهم سهله وحلوه ومافي تعقيدات وبعدين اكثرهم الشهره اهي اللي يايتلهم مايحاتون شي مايفكرون بشي

طموحهم وبس ومافي ابواب مسكره

بهاجر متى :(

Joonna said...

عزيزتي من صجــــــج صدقينــــــــي نقمـــــــــــــــــــــــــــه يا حلو البساطه و الحياه الطبيعيه استمتعي :)

nikon 8 said...

صيري مذيعة في قناتج الخاصة
وطلعي طلعة بكم موضوع مدوي بالأول أوبلوك غير مألوف كمذيعة .... بشرط يكون مقبول للأهل والعادات والتقاليد
يعني لا بأس تطلعين بالعباية لأن ما عندنا مذيعات يلبسون عباية أو برقع أو نقاب
!!!
ولا تنسين الراعي الرسمي للبرنامج ويفضل يكون مصممة عبايات
هالأيام العبي صايرة أغلى ما يكون
!!!!

Anonymous said...

النعمه تريديد حمد وشكر وشكر كبير

Anonymous said...

النعمه تريديد حمد وشكر وشكر كبير

Corpse Bride said...

انا اقول العرض كان حلو والسيارات كانت احلى..

بالنسبه للشهره...ما اعتقد ان وضعنا يسمح بالشهره على طريقتهم..

بس انا وباعتقادي انتي اشهر من نار على علم في علم المدونات..

مساج الله بالخير

Fahad Al Askr said...

ودي أساعدج بس الموضوع طلع من إيدي، خلينا ننطر قرار اللجنة وبعدها نشوف، إذا عندك مدخل على الوزير خل أحد يكلمه

هذه العبارة اللي كله يقولونها حق أي واحد موضوعه مو ماشي أو واسطته مو شي

I7na 3shagnaha said...

مساء الفل.. عاد عسى تحبين الفل.. انا من عشاقه :)

شرايج بالحظ

lUCK

انا وايد عندي قناعة فيه

و بعدين اش لج بالشهرة و الطلايب..
حق العين بس

ويك اند سعيد:)

Q80 Blogger said...

لو الفلوس موجوده والشهره موجوده وكل الي قلتيه موجود
بس دام بالكويت !!!
للأسف .. الجمال مفقود .. !!
ما الوم بناتنا .. الجو مايساعد والجكر من الترااااث

طبعا الكلام بشكل عام .. ما اقصد التخصيص

والانتخابات كاهي بالطريج .. نزلي روحج واحنا معاج .. يمكن تصيرين هيلاري الكويت ماتدرين !!

AseeL said...

تفاءلي

enter-q8 said...

اهو في حل واحد بس ما احبه
انكم يا معشر نون النساء
تصيرون ارهابيات نفس سميرة

بنت الشاميه said...

:

يااااا مساء الخير
وانت اول تعليق....اناااااسه
البيت بيتج وان ما شالتج الارض نشيلج
فى عيوناااااا

ياااا بختى اول مره اربح شيئ
بس يقولون حرام....وبعد لوتري انجليزي
لا يحوشج......ههههههه
زيوووون انا اتكلم عن اي وحده بالكويت موانا ان شاء الله يبلغ بوحدة مثلهم
بس ترا هذا وعد بتسوين لي قصة طووووويله عن كفاحي
التدويني بس لا غير
بدون سياسه

واحلى شيئ اسم الروايه
كفاح بنات مضارب الشامية
لووووول
الظاهر بركب فيها خيول وبسكن خيام بالبر.....واقول شعر.....هههههههه
خليتنى اشطط من الحين
مشكووووره
======
اذا كلمتى الزوز سلمى عليهاااا وايد

بنت الشاميه said...

Blog 3amty :

شرطهم لازم يشوفون ويهها
وادري ان العمة مااااا ترضي
الله يخليك خلها تسامحني

بنت الشاميه said...

مبيوق :

والله محد مخلين انتفخ واورو الا انت من هالكلام الزين
انا اتمنى ان تكون بينهم وحده كويتيه مميزه عالمياااااا
لان بناتنا يستاهلوووون
طبعا مووووو انااااا
انا بس كافى علي مدونتى
تسلم

بنت الشاميه said...

nanonano :

انت اللى فاهمتني على طول
شفتى السيارات ...شيئ مو طبيعي
بس بسكت ومانى قايله اكثر
لوووووول

لا الله يخليج مااا لي خلق سياسه ولغواااا
اصلا ما اقدر عليهم
ان شاء الله اى وحده كويتيه
توصل وتكون مميزه عالمياااا
عطله سعيده

بنت الشاميه said...

اجار الدين كشمش :
الله يااااينا منقل علينا...شوي
شوي علي
كانت من بينهم هيلاري كلنتون
وكريستينا كريشنر
زوجة الرئيس الأرجنتيني نيستور كريشنر

هذول ريايلهم مشهورين...ومهدوا لهم الطريج.....اما
امبراطور اليابان ,
اسماعيل ياسين, القصبجي ,
عبدالسلام النابلسي
خلهم يستريحون ...محد حاجاهم
فهمت الحين

وهذا اللي انتو ا زاهبين فيه
تدقرنا وتكسير مجاديفنا
وانا بقعد بمدونتى مانى رايحه مكااان
بس اتمنى ان تكون كويتيه اااي كويتيه
موووو انا ...... معاهم

وبعدين الزين محد يقدر يعذربه
وستريداااااااا جميله
والاحلى منها ريلهاااا الحكيم
سلاااااام
ماااا طلعت الشاليه...؟؟؟؟

بنت الشاميه said...

ANGEL HEART :

كلامج صح ....مجتمعاتهم تساعدهم
وتعينهم...والوضع صعب عندنا
بس ماااا يمنع ان نتمنى ان تصل كويتيه مثلهم وتكون مميزه

وبعدين مااااا كو هجره
ماااا كو على الكويت
احلى وطن
نهايه اسبوع سعيده

Anonymous said...

بنت الشامية

فى طريق قصير جدا للشهرة

مثلا لو تسوين بنجى جمبنق
Bungie jumping
من أبراج الكويت راح تكونين مشهورة جدا أكثر من حاليمه بولند
وتكونين أول أمرأة كويتية تقوم بهذا العمل الخارق والصحافة المحلية والعالمية راح أتغطيك
والفضائيات راح تتابعك

وبعدين وين ما تروحين ناس تأشر عليك وتقول هذى بطلتنا بنت الشامية اللى نطت من الأبراج
صج أهى اللحين ماتتكلم من الخرعة
بس رفعت راسنا فوق

والكويتين يردون بهزة راسهم المعروفة ويقولون

نعم نعم فعلا أنها بنتنا

بنت الشاميه said...

Joonna :

بس عندنا كويتيات عندهن طاقات
وتقدر تخدم وطنها اكفا منهم
هذى مجرد امنيه ان تصل وحده منا مثلهم
هم مو قدوة نقتدي بهم
بس مجرد امنيه

بنت الشاميه said...

nikon 8 :

الزين واستكانه مناشيبن على المذيعه
بقناتنا الفضائيه
لوووووول
لا والله اتمنى ان تصل الكويتيه الى اكثر من ما وصلن هالعشر
هذيل مو احسن منا
ومن يدري يمكن تتحقق امانينا

بنت الشاميه said...

mob :

اللهم لك الحمد والشكر
حمد وشكر القانعين
اللهم لك الحمد والشكر
حمد وشكر الصابرين
اللهم لك الحمد والشكر
حمد وشكر المنعمين
اللهم لك الحمد والشكر
حمد وشكر الرضاة المرضيين
=======
بنسكت وما راح نتمنى اي شيئ ....!!!!!ء
الله الحافظ

بنت الشاميه said...

Corpse Bride :

واجبنا الوطنى يجتم علينا نشوف العرض العسكري.....صج حلو
وعلى قد ديرتنا ..الله يعطيهم العافيه
والسيارات حدت ولا حرج....!!!!ء
ومشكوره على حسن ظنج فينى
بس هذى امنيه للمراة الكويتيه ان تصل الى كل المستويات
وان شاء الله انها تقدر ان تصل
نهاية اسبوع سعيده

ReLaaaX said...

خلااااص انتي حطي امنياتج وجابليها كل يوم وتتحقق

حسب كتاب ذي سيكرت ;p

عاجـل said...

وايد الجواب سهل


لي حج البقر

بنت الشاميه said...

Fahad Al Askr :

الله يسلمك ويطول بعمرك
بوعسكر ساااااعدنى
انت رفيجك الاطخم يعطونك ويه اكثر منى
ترااااا بعتمد علي الاطخم....وعليك

بنت الشاميه said...

I7na 3shagnaha :

مساءك فل
انا بعد احبه وايد
تهقين يعطونى عين ويكودوني
اذا جذي ولا بالله ما فينى شده
ارضى بالواقع احسن لي
عطلة سعيده

بنت الشاميه said...

Q80 Blogger :

عمليااااات التجميل ماااا تقول شيئ
كا حليمه شحلوهاااا
ماااا ضرهااااا
الجمال يصنعونه ما عاد مشكله
غشيت من الضحك
هيلاري الكويت
خووووش اسم
عطله سعيده

بنت الشاميه said...

AseeL :


كلناااا لازم نتفائل
حياااااج الله....الصوره تراهااا حلوه
كيوت

(:

بنت الشاميه said...

Enter-Q8 :


ابيه هذا رايك فينااااا
والله نون النسوه طيبيات وحليوات
حرااااام عليك

بنت الشاميه said...

daggero :

ههههههه
اذا صرت انت قبلي
ارضى اقمز...لوووول

لايبه من الحين اهون... مااااني مستغنيه عن عمري
والفضائيات ووكالات الانباء مااا ابيها تعرفني
هذا انتقااااام للمراة
والله منت بهين
اخشها لك.....هذا يزاي اللى خليتكم
تسيرون عندي بالمدونه

لووووول

بنت الشاميه said...

ReLaaaX :

بشوف بحطها جدام عيني كل يوم
بس عاد اخاف اتلخبط من كثرهم
هههههههههههه

بنت الشاميه said...

عاجــل :

واذا حجت البقر
شتعطيني....؟؟؟؟؟؟