Saturday, February 28, 2009

الأرمله


عندي صديقه من زمان ما شفتها
و لها مكانه خاصه ومميزه عندي...أمس شفتها
وهي أرملة من 15 سنه
توفى ريلها وعمرها 32 وكان عمر
عيالها البنت 10 والولد 8

وسألتها عن معاناتها من توفى ريلها إلى الحين
جاااااااان تقول مرت علي أيام محد يعلمها الإ الله
بس الحمدلله كل شيئ الحين خلص وهان الولد
تخرج والبنت تزوجت الحمدلله وأخذت خوش ريال
جان أقول لها مافكرتى بالزواج مره ثانيه...؟؟؟؟؟
ما أحتجتي واحد يكون بجانبك يعينج على الحياة...؟؟؟؟
إنت إلى الحين جميلة وحلوه وكل من يتمناج زوجه
قالت لى بقول شيئ لأول مره أقدر أقوله
شوفى إنخطبت مرتين من توفى ريلى
المره الأولى رفضته و بإصرار وبشده
حسيت بإاااهانه شديده على نفس ولنفسى يمكن
بعاقب الزمن اللى رملني وأنا فى مقتبل العمر
فرفضته...رفضت الخطبه نهائيا وبدون نقاش
وتقدم لى واحد ثاني بعد مده
عاد هذا اللى مااااا ينرد ولا أقدر أرفضه
وموووو متزوج...بس خفت أحجى حتى حق أمى
ومر علي أسبوع ما غمض لي جفن.....أحاتي
وطبعا خفت .... خفت من نظرة الناس لي
واللي رعبني نظرة حمولتي لي أكثر وأكثر
وبعدين شلون أتزوج وبنتي قاعده تنخطب.....؟؟؟؟؟
المجتمع يحكم على الأرمله بالإعدام إجتماعيا
فلا يراعي إن للأرملة إحتياجاتها الخاصه
النفسية والجسدية والإقتصاديه حتى العاطفيه

تصدقين رفضته وأنا أبجي دم مو دموع
وظل يتردد علي خطبتى أكثر من سنه ولكني
رفضته خوفا من نظرة الناس لي و لعيالي
ليش لما يتزوج الأرمل يقولون إنه مسكين
وما يقدر يعيش بدون امرأة ترعى شئونه وتربي
عياله برغم أنه الطرف الأقوى والأقدر
على مواجهة الشدائد
اما إذا فكرت الأرمله بالزواج فلا يتردد المجتمع
في إتهامها بنكران الجميل
وعدم مراعاتها مشاعر أهله وأبنائها والسعي
وراء مصالحها الشخصية على حساب مستقبل أبنائها
فلماذا يؤيد المجتمع حق الأرمل بالزواج
وينكرها على الأرملة رغم إنها الجانب الأضعف
والأشد احتياجا لشريك يحميها ويتولى رعايتها؟
عندج جواب لي ....؟؟؟؟؟؟
علشان أصير .... أم سنعه لازم أدفع الثمن
وأتحمل وأرضى بقدري...!!!!!!ء
طبعا أنااااا معاها بكل كلمة قالتها بس ما باليد حيلة
أترك لكم الرد عليها

37 comments:

مركبنا said...

بنت الشامية

الموضوع هذا وايد حارني
توها مدونة دلال حاطة شئ قريب له
عموما

المراء لها ان تتزوج لو عندها درزن شرط ان الريال يحافظ على اعيالها
وهذا الشئ اصلا احسن حق العيال
بلا تضحيات بلا معني
تصدقين اعرف وحدة عندها سبع يهال اكبرهم بالجامعه
تطلقت والحين اهيا متزوجة من واحد 2
ولا بعد اهو مو متزوج من قبل
اول شئ عانت من نظرة الناس تدرين الكل كان يقول ناطرين البنت التزوج تزوجت الام
بس بعدين الحياة مشت
والمره حالتها اصعب من الريال
وتحتاج لمن يكون حولها

ادري دولت بس الموضوع حارني

Hasan.B said...

She should have married the second guy. Do not see anything wrong with it. I am obviously not blaming her. Its a tough decision. I blame our idiotic society.

chandal/danchal!! said...

عزيزتي بنت الشامية

التفكير هذا تفكير يديد علينا ومو من سلك اهل الكويت

قبل على ايام يدتي الله يرحمها ... المرة اللي تتطلق او تترمل لازم تتزوج و ما تقعد بروحها... تلاقين على طول ياخذها حماها او من عيال عمامهم

تلاقين الاخوان عيال عم و اخوان بنفس الوقت
:)
شي يدوده

ولا اذا قالوا "خواله عمامه" ليلحين اسأل ابوي عن هالجملة و يجاوبني و ارد انسى

:)

يمكن لان الظروف كانت غير و المرة كانت لا حول ولا قوة... بس بهالسالفة... احس كنا وايد اسمح ووايد على الفطرة والسجية... الحياة كانت وايد ابسط... و مافيها عوار راس و سيناريو شقولون الناس

الناس بتتكلم بكل الظروف مع الاسف... سواء تزوجت او ظلت ارملة

وبالاخير اقول الزواج قسمة و نصيب

كويــتي لايــعه كبــده said...

تهون على الواحد مشاكله لما يشوف غيره

ما اقول الا الله ما يحمل عبده الا اللي يقدر عليه

وصديقتك المحترمه سوت اللي شافته صح بالرغم من صعوبته وعدم العداله فيه. شافت عيالها قبل نفسها بالرغم ان لها كل الحق باتخاذ القرار العكس

سلمي عليها
ووصلي احترامي للشخصيات القوية
(ما شاء الله)

Mohammad Al-Yousifi said...

مع احترامي لك و لصديقتك بس

طز - كبيرة - بالمجتمع

و خصوصا مجتمعنا الذي يداوي جروحه بنتيء جروح الآخرين

مقابل هالمجتمع المريض , انا اشوف مصلحتي و اقيم الفعل اللي بقوم فيه و اشوف اذا كان في شي غلط او لا؟

هذا رأيي و أكرر اسفي لك و لها

بس خربت على عمرها

I7na 3shagnaha said...

الخيره فيما اختاره الله..الحمدالله ربت عيالها و كبرتهم و زوجتهم..و بتصير جدة سووون و أحفادها يترسون عليها دنيتها .. الحمد لله على كل حال, يمكن لو هي متزوجه جان يابت حق روحها عوار الراس و اللقوة, تعبها إنشاءالله مايضيع, و يبارك لها ربي في عيالها..

ZooZ "3grbgr" said...

انا مع مطقوق قلباً وقالباً

يعني شكو أطالع الناس شيقولون

منو بيعيش حياتي انا ولا الناس

الناس بيظلون يحجون طول عمرهم

لكن آنا اللي أعيش همي

نفس اللي بمدونتي كاتبه عنه

احنا نعيش الغزو وباجي الدول يقولون سامحوا ويترحمون على الخسيس صديم

شوفي يالغالية

ما ابيها تتندم كل شي قسمة ونصيب

بس انها ترفض عشان الناس

ترى تالي الليل كلٍ بيحط راسه على مخدته وينام وما يذكر همها حتى لو تعاطف معاها

أما انها ترفض حق عيالها فهذا اختيارها

سلمي عليها وقوليلها عيشي حياتج بلا ناس بلا هم

والله يخليلها عيالها

TruTh said...

انا مع راي الأخت
I7na 3shagnaha

زين سوت كرست نفسها لعيالها،مو دايما زوج الأم يكون زين،يمكن لو متزوجة جان الريال غربل عيالها و ظلمهم،او يمكن يكون اناني و يبي اهتمامها يكون فيه اكثر من عيالها،
اهيا المسؤولة عن تربية عيالها و الله راح يحاسبها على تربيتهم فانا اشوف ان احسن شي انها ما تزوجت

و طبعا أجرها ما راح يضيع عند رب العالمين و الله يعوضها بالآخرة ان شاء الله

وتحياتي لج

سبمبوت said...

لا تحطون اللوم على المجتمع يا بنت الشامية! حطّوا اللوم علينا إللي سكتنا ورضينا بقوانين وضعية لو نرجع لأصولها وماضيها راح نلاقي أن الحريم نفسهم حطوها لنفسهم بإسم السنع!!

ليش المرة المطلقة منبوذة والأرملة مطموسة و اللي ما تزوجت مشكوك في امرها وبعض الأحيان اخلاقها!! منو إللي قال ومنو إللي فسّر وحلل أن المرأة لازم تمشي في طريق اسود وعر لمّا ما يكون في رجل في حياتها؟ ..

لازم تختفي هالنظرة وتنقرض هالأعراف السخيفة .. شلون؟؟

لمّا كل امرأة مطلقة تعيش حياتها وتبتسم للدنيا وتشتغل وتكسب رزقها ورزق عيالها وتصم اذانها عن كل لغط وسخف يعترض طريق حياتها إللي ترضاها

لمّا كل ارملة تحزن فترة ثم تعيش حياتها حتى لو ما تقدر تنسى فقيدها .. تتزوج الرجل إللي ينفتحله قلبها وتعيد المحاولة مرة ثانية وثاثة ورابعة .. وإللي يتكلم، خلها تحط اصابعها بعيونهم وتقول لهم هذي حياتي مو حياتكم !!

واللي تأخر زواجها لازم ما تنكسر، ما تحس ان في شي ناقصها لإن المرأة عمرها ما اكتملت فقط لمّا تزوجت .. هي كاملة خلقها الله كاملة وما كو شي يكملها إلا نفسها

خلاص .. بطلوا من ( شيقولون عني الناس ) بطلو من ( أخاف من نظرة المجتمع ) لإن الناس عايشة حياتها والمجتمع نايم بالوحل.

Anonymous said...

صاحبتك كانت غلططانه لاالشرع ولاالتقاليد تمنعها وخوفها مالة داعي بس الحين خل تعقل و تستانس باحفاهدها ام سليمان المسقطي

عثماني said...

اخيتي

عندنا مجتمع ما يرحم

لان ببساطة مجتمع مريض

المفروض انها تتمرد على اي نظره طالما انها ما خالفت شرع الرحمن

حسافتج يا كويت said...

بنت الشامية

قبل عيب المرأة تقعد بالبيت
من يموت ريلها او تتطلق بعد ما تخلص عدتها تلاقينها عند ريلها اليديد

كبرت الكويت ويبنا حق عمرنا الكلافة و راحت بركة العيشة وصرنا نشوف الأوادم أكثر مما نشوف عمرنا

الزواج شي شرعي وحق للزوجة
نعم قبل المرأة تاخر الريل علشان يصرف عليها
واليوم ما عادت المرأة محتاجة لصرف الرجل ولكن الزواج مو صرف وبس
الزواج سكينة للمرأة والرجل

بعتقادي الزواح حق للمرأة الأرملة او المطلقة ومن دون شروووووط
بس يحبذ ان يكون الرجل مقدر ظروفها وعيالها

أما سالفة الحمولة وحجيهم فهذا كلام سخيف

خل يزعلون ولا تخترب حياة المره


عموما تحياتي الحارة لرفيجتج ولكل من على شاكلتها اللي سخروا حياتهم لعيالهم ومايضيع عند الله

Bloggerista said...

ليلحين الكل أجمع على نفس الراي

خلها تتوكل على الله و تتزوج
الناس اللي يحجون فيها الحين ما رح يفيدونها لي كبرت و ما عاد لها ونيس بالدنيا

دام انها ربت و كبرت و سوت اللي عليها محد له شي عندها

بس ما قلتيلنا, عيالها شنو رايهم بالموضوع؟

nikon 8 said...

الشرع قال الرجل الأرمل يدفن زوجته ويتزوج ثاني يوم والمرأة الأرملة تتزوج بعد العدة ... لكن اللي صاير كله أشياء مستوردة من تأثير الأفلام علينا والقصص .
كانوا جداتنا يترملون ويتطلقون ويتزوجون مرة ثانية وتلاقينهم عيالهم خليط من أبهات تجمعهم الأم
الله رحيم بعبادة وهو أبصر وأدرى بإحتياجات البشر لكن إحنا القاسين
وبعدين الناس اللي بيلومونها هل راح يوفرون لها إحتياجاتها كإمرأة تحتاج رجل يسندها
أشك بذك
ومع ذلك الفرص لا تزال أمامها فلا تتردد بالزواج
وعلينا الإستقبال
:)

ANGEL HEART said...

والله انا اقرى منقهره برد بقهر بس شفت كلام مطقوق وزووز ارتحت شوي

ماحب هالقيد اللي نفرضه على روحنا عشان الناس والمجتمع طالما انه مانسوي شي غلط ولاحرام وبشرع الله ليش لا الناس
لازم نتعلم ونعلم كل الناس هالشي انت مرتاح بقرارك وحاس انه بتعيش سعيد مرتاح خلاص مالك شغل باحد لان الناس ماراح تعطينا السعاده ولا راح تعوضنا عن شي ماسوينا عشانهم وبالاخر محد بيدري عنا

بصراحه غلطت بحق روحها وروح الرجل اللي اختارها شريكه لحياته واصر على اختيارها

enter-q8 said...

طبعا الندم ما يفيد يا وخيتي حاليا
لكن المشكله تقع عليها ايضا
لنها ايضا رضخت لسجن العادت و التقاليد
اذا ما هي اكسرته و غيرها و غيرها و غيرها
و يحطم هالزنزانه الغير انسانية و و الشرعية كذلك
شنو اهي مخالفه شرع الله ولا شي
و زواج و ستر و عيالها المتقدم عارف انها لديها عيال لنفترض انهم صغار يعني عارف شنو مقبل عليه
ما ادري شنو هالتفكير و خصوصا اننا نتكلم عن شرع الله
ابي احد يتكلم و الله لأقول له هالكلمة شرع الله هل عندك اعتراض عليه

ولاّدة سابقاً ... رانيا السعد ...رانية المنيفي حسب الأوراق الرسمية said...

أكبر فخ ينصبه المرء لنفسه حين يفكر فيما سيقوله الآخرون

على صديقتك ان تفعل ما تراه صحيحاً لأنها ستكون عرضة للانتقاد على اية حال

Don Juan said...

ياااادي على هالعادات و التقاليد
جدام الله سوت شي غلط ؟
خلاص عيل شماله جذي سوت بعمرها
والله ضيعت عمرها بصراحة عشان العادات و التقاليد
و المشكلة هم احنا بمجتمع ما يرحم دايماً المطلقة ولا الأرملة يسوونها الناس ,,, ولا ماني قايل كلكم تدرون

مشكلة :(

Anonymous said...

الحين اهيه متحسفة ليش انها ضحت عشان عيالها و عشان تربيتهم اللي كاتبين حرام و ما تستاهل لو كانوا مكان عيالها عادي اشوفون واحد ثاني مكان ابووووهم والله قوية صراحة بعد لو ماعندها عيال ماشي بس عشان عيالي والله كل شي اهوووون

ZooZ "3grbgr" said...

بعد عمري يا انانيموس

الموضوع وما فيه

قبل بالكويت ما مر عليج وحده من الحريم الكبار يقولج كانت حلوه ليش انها ماخذه ثلاث رياييل؟؟

ترى سوالف المره ما تتزوج ما طلعت الا الحين

قبل ما يهدون المره بروحها

وبعدين تلقينها تربي فريج مو بس عيال ومن احسن ما يمكن

سوالف ريل ام ولا مرت ابو هذي سوالف افلام مصريه

الوحده لي نقت عدل واحد يخاف ربه بعيالها ماراح يصير فيهم شي

ولا شنو اشوف امي مع ريل ام ههههههه عادي شنو يعني ياما ناس ربوا جذي واحد ياخذ مكان ابوهم شنو بيروح عنه الباص؟؟ مو حكمة ربج يومه بياخذه بكتبة رب العالمين .. وجانها تبي تربيهم خل تربيهم محد يقولها غصب تزوجي بس لي بغت تتزوج تستحي من الناس؟؟؟

وين قاعدين شهالاسلام؟؟ قبل كان الحرام صعب عشان جذي تشوفين الواحد اللي يحب الحريم يتزوج وايد مثل يدي رحمة الله عليه كان سندباد هههه

بس الحين صار الوضع الحرام سهل والزواج صعب ولويه مشينا الناس كلهم بالحرام والسبة هالحجي

الاختيار الصح اهو الاساس

ولا اعيش اجابل فلان شقال وفلانه شقالت همي انا بروحي اشيله ما اخذ منهم الا قيل وقال

هذا كلام ماخوذ خيره

الدنيا تغيرت بس احنا بنظل على هالمفاهيم السخيفه؟؟

الدين ما سوى جذي

الاعراف اللي سوت

طبعاً تعرفين الفرق

أغلبها قوانين غبيه حطوها ناس ماتوا من عشرات السنين

واحنا ناكلها

ولا اشياء دخلت علينا من دول مجاورة ونبتلش

الوحده تخاف ربها وتحافظ على سمعة اهلها وتبدي عيالها بس لي لقت واحد يوقف يمها ما تقول لأ

إلا إذا اهي اللي ما تبي مو خوف من كلام الناس

هذا عني وعن كل اللي قالوا

سلام

:")

اجار الدين كشمش said...

اختي بنت الشاميه

طبعا المراه الناضجه بفكرها وليس عمرها كاصديقتك

تحسسب الف حساب ..لاهل اولادها

هذي هي المراه الكويتيه الطبيعيه

ويجب ان يعرف المعلقين ...ان دمعت ابنها

بالليل ..لوحده وامه في الغرفه

التي اغلقت بعد ...ان شرف الحبيب الجديد ...لا يساويها عند المراه ..العاقل إلا احتضان حشاشة يوفها وان تشرع الابواب لبلا ونهارا

لان يناموا معها في بعض الليالي

بنفس الفراش كما اعتادوا مع والدهم

وهذا الوضع هو الصحيح اذا اذا ها اذا

اوضاعها الاقتصاديه متيسرة الحال

اما اذا كان الوضع الاقتصادي سيئ وينذر بان يدمرها وابنائها

لا والله ...وايضا من اجل الابناء

ان اختار من اعتقد فيه الامان

على بناتي وهو الاهم وعلى اولادي

ولكني يجب ان احمي نفسي ..اذا كان المتقدم شاريني انا واعيالي

بشششرط ان يتنازل لي عن حقه في الطلاق ويكتب في عقد القران \الملجه\

ونكون نحن متساوين بالطلاق

له الحق ولها الحق

وهذا شرعا جائز

لابد ان تحمي نفسها من ملل الرجل

في الحياة الزوجيه ...وعسارته تنتقل الي كتف المراه الضعيف وهم ابنائها

هذا الشرط يجعلها تنغض عليه كالنمره لجمايتهم

فمالله

اجار الدين كشمش said...

تكمله

ودي اضيف شئ مهم وتوضيح وجريئ شويه ..ترا الحب مووووو فراش ...الحب اوسع واشمل وحياة اخرى ممكن ان تعيشها الارمله مع صديق مخلص امين في صداقته وكل من قاعد في بيتهم ... يكفي تيلفون يسال عنها او لقاء في اي مكان عام صاد ...عن محترفين الحجي
تعرف برنامجه ويعرف برنامجها
كالصديقه العزيزه ولكنه رجل

سندها وقت العازه ..وهذا موجود هذه الايام ولكنه بالسر

من الخوف بعدم فهم وضعهم الحقيقي كا اصدقاء

ادري هالمجتمع لاااايتقبل هالصداقات

انا رايي بالعنه ..هي تعيش وتعيش افضل من الالتزام بزوج يطلع عله

كل مرتز بالصاله ...واوامر

مالها اول ولا ثاني

فمالله

إمـرأة لا تُنسـى said...

ماراح أزيد شي عن اللي قالوه إلا شغلة وحدة مهمة

المرأة، بعدما عيالها يكبرون ويتزوجون
ويسكنون في بيوتهم
وينشغلون عنها
لو شوي

اش بتسوي طول اليوم قاعدة بروحها
ترفع التليفون على ولدها وإلا بنتها
واتوقع ماراح يجابلونها 24 ساعة في اليوم
يعني المرأة بيصير عندها فراغ كبير
حتى لو حاولت تشغل نفسها بدوام ثاني
بنادي رياضية
وبعدين؟

لما يكبر فيها العمر
وتصير عيوز
حلاته يكون معاها شايب
تقعد معاه الصبح على ريوق وجرايد
ويتغدون يميع ويتعشون مع بعض
تلقى أحد مجابلها وتسولف معاه

العيال أول وتالي رايحييين بطريجهم
المرأة لما تكبر في السن فوق الخمسين
ترى نقول كفّت ووفّت
ربت عيالها
وأحسنت تربيتهم
لكن مو ملزومة تكون مـس ناني
أو بيبي ستر لأحفادها

charisma said...

الله يرحم الحال ويكون بعونها وياجرها على صبرها وتحملها


ما ادرى بس الى يحبها يتمنى لها الخير والله يا بنت الشاميه الناس مشكاهم لله بس يبون يتحجون وينتقدون ما يحسون بالمعاناة ولا يحسون بالى نمر فيه لهم الظاهر
لاهو عيب ولا حرام اذا تزوجت
الناس بتكلم شكثر؟؟ يوم يومين سنه سنتين وبيلهون بسالفه ثانيه وبتمشى الدنيا واهى بيض الله ويها جابلت وربت واتعبت وعيالها كبار مو صغار!

اصدقين اووول كنت اعمل حساب الناس وشبقولون الحين الى ابيه اسويي واااخر همى الناس والمجتمع
ومجتمعنا مرييض وتعبااان ويلوع الجبد وكلنا ندرى
ماكو شغل واحدهم يطالع الثانى محد يطالع نفسه

استغفر الله

الله يكون بعونها

فريج سعود said...

والله من حقها تخاف كلام الناس لانه احيانا كثيرة يكون مؤذي

بس بالمقابل اذا كان الزوج من النوع السنع يقدر ينسيها ابو المجتمع

والحين اذا تقدر تتزوج خلها تتزوج دام عيالها كبروا وتفهموا

حرام المرة تدفن نفسها علشان كلام الناس

اخر عمرها بتندم قد شعر راسها

اشماخذين من الدنيا احنا بالله

ReLaaaX said...

بنت الشامية .. قلتها من قبل وارد اقولها مجتمعنا ظاااااااااالم للمره بموضوع الزواج بالذات


يت على المطلقه لا خذاها مو متزوج؟
زين ليش مايصير نفس الاستنكار لما ياخذ اللي ميته عنه مرته مره ثانيه عقبها؟

ليش الكويتي ياخذ له لبنانيه سوريه عراقيه مصريه امريكية اوروبيه ..ألخ اللي اهو حلال ولا خذت كويتيه منهم صار حرام ؟


ليش لما الكويتي ياخذ وحده صغيره واهوا شكبره عادي وجنه العيد ؟ ولي خذت الكويتيه واحد اصغر منها بسنه قامت القيامه ؟


ليش المطلق لا تزوج بنت قالو عااااادي الريال يشيل عيبه .. والمطلقه لا خذاها واحد مومتزوج من قبل قالو ساااااحرته !!!




المفاهيم عندنا فيها خلل

--

ترى ماتطرقت بعد حق سالفة الاصل والفصل عشان ينتهي الموضوع اليوم :)))

بنت الشاميه said...

اسفة تاخرت بالرد عليكم

لظروووووف طااااارئi

ارجو المعذره

بنت الشاميه said...

مركبنا :

كلامج صحيح من حقها ان تتزوج
هذا شرع الله لانها الحلقة الاضعف
شكرا لتفاعلج للموضوع






Hasan.B :


تدري اللى كانت خايفه منه
ان لو تفشل تجربة الزواج
ما تقدر تتحمل كلام الناسو....محد يرحم

شكرا لتفاعلك ....وحياك الله






chandal/danchal!!:
الموضوع قديم يديد
اول صج كان عادي
ولازم يصير الحين عادي
تراولى بهالزمن تجتاج الازمله والمطلقه من يحميها من الذئاب السايبه
بالمحتمع
شكرا لتفاعلج على الموضوع وحياج الله

بنت الشاميه said...

كويــتي لايــعه كبــده :


الحين العيال كبروا
وصارت بروحها
والله ادرى بعباده
يوصل السلام

شكرا لتفاعلك






ma6goog :


هى من حقها تسوي اللى تشوف هى صح
بس ما تقدر تنفصل عن المجتمع
لازم تاخذه بعين الاعتبار
وكذلك للعيال رحمه بالقلب ما تقدر الام تصد عنها
فتتنازل من اجل عيونهم
والله ارحم بعباده

شكرا لتفاعلك





I7na 3shagnaha :


كلامج صحيح الخيره فيما يختاره رب العباد
لو الله كاتب انه يصير من نصيبها
جان تزوجته....الخير فى عيالها ان شالله

بنت الشاميه said...

ZooZ "3grbgr" :
ا
لكلام سهل
بس اللى ايده بالماي غير اللى ايده بالنار.....هى تحسب الصغره قبل الجبيره

تراه قرار صعب واااايد
الله يحفظها ويكتب ما فيه الخير والصالح لها

شكرا لتفاعلج لقصتها








TruTh :


قلب الام ما يهون عليها عيالها
ويما كان زوج الام احن من الابو نفسه
بس من تقدر تتخذ مثل هالقرار
قرارا صعب جدا


حياج الله








سبمبوت :

هو قرار صعب
الزواج مرة اخري مو سهل
لانها لازم تفطر الف مره
ومجرد مرور فكرة الفشل على بالها
يزيدها رعب وخوف من اتخاذ القرار
فلما رفصتهم احست بالراحه
ليش.....هى تتحمل قرارها
الله يكون بعونها ويعينها

شكرا لتفاعلج مع مشكلتها

بنت الشاميه said...

ام سليمان المسقطي :

هى طافتها الفرصه
وما عندها الا احفادها
الله يكون بعونها
لا تقاطعينااااا لو سمحتي





عثماني :


اكيد هو شرع الله
بس هو قرار صعب
الله يكون بعونها
حياك الله







مبيوق :

طبعا كفة الاولاد هى اللى كسبت
ما اقدرت تغلب مصحلتها الشخصيه عليهم يزها يالينه ان شاء الله
وخوفها من المستقبل كان عامل مساعد لرفضها فكرة الزواج
الله يكون بعونها

ومشكور لتفاعلك معها








Fashionista :


هى من خوفها ما علمت احد ما تبي اي احد يضغط عليها
ما علمت حتى امها .....رفضت تقولها
تبى قرارها من راسها بروحها بس وبدون اى ضغط او تدخل من احد

تدرين صعوبه اتخاذ مثل هالقرار
الله يكون بعونها
وحياج الله

بنت الشاميه said...

nikon 8 :


اكيد محد له شغل عندها غير اهلها وعيالها.....لس لازم تحط بعين الاعتبار الناس اللى حواليها
واهم شيئ كان فشل التجربه هو اللى صعب عليها القرار
فاتخذت الهروب من المشكله..... بالرفض
وهذا هو قدرها.....قرار جدا صعب
الله ارحم بعباده
شكرا لمرورج وتعليقج






ANGEL HEART :


يمكن اغلطت بحق روحها
بس اكسبت راحتها النفسيه
وهى مقتنعه لو الله كاتبه لها زوج جان تزوجته.....بس الله مو كاتبه لها زوج
هى قدريه وراضيه بما قسمه لها الله

قرار صعب ...الله كان بعونها

شكرا لج ولتفاعلج معها






Enter-Q8 :


اكيد هو شرع رب العالمين
بس هناك قيود تكبل اليد
الاولاد والاهل والعائله
لازم تاخذهم بعين الاعتبار
هذول دائرتها الحقيقيه
فيمكن لخوفها على نفسها وعلى عيالها
رفضت ان تتكلم وتبوح لهم
فاثرت رفض الزواج
المراة مسكينه هذا اللى اقوله
الله يكون بعونها

حياك الله وشكرا لتفاعلك

بنت الشاميه said...

ولاّدة :

اللى شافته ان ترفض الزواج
لانها اضعف من تتعرض لاي انتقاد
مو عليها بس خوفها على عيالها
القرار كان صعب عليها
فاثرت الهروب بالرفص
شكرا لمرورج






Don Juan :

ما قدرت تخرج علي العادات والتقاليد
تربيتها منعتها من تستخدم حقها الشرعي مقابل عاطفتها لعيالها
الامومه شعور واحساس صعب
ان قايضه الام ياى شيئ بالدنيا

شكرا لمرورك





Anonymous "


هى مو تحسفه بس تفضفض اللى بقلبها
ساعات اذا حاشتها الوحده تتمنى انها ما رفضت الزواج.....تظل هلى انسانه لها احساس وشعور....وهى مؤمنه بما كتبه الله لها فتحمده وتشكره على كل حال
حياج الله وشكرا لمرورج







اجار الدين كشمش :


اجار ما اعبر على شطحاتك
اول شيئ

زواج المغربيات والجزائريات بفرنسا خلهم عنك... يووووز..
احنا بدو الصحراء
ما عندنا ناس تتشرط بالزواج
خلك عن زواج السفر

وخلك عن الصدقااااات اللى ما منها فايده....المراة تبى زواج
وينك عن المسيار مو افضل من الصداقه
استر لها واحسن من اللى قلته كله

تهقا منو رئيس الوزراء اليديد..؟؟؟؟؟

حياك الله وشكرا للمشاركه








إمـرأة لا تُنسـى :


ما اقول الا بعد عمرى يالمراة
كله تتنازل حتى عن حقوقها من اجل غيرها
كل تحب الايثار......الله يعوضها خير بالدنيا والاخره

شكرا لتفاعلج

بنت الشاميه said...

charisma :

ما يصير ياكريزما ما عليها من الناس
احنا نعيش وسط مجتمع
وعلشان الوحده تعيش مرتاحه لازم تتوافق مع مجتمعها
وهى اثارت عيالها على الزواج
فتتحمل قرارها
والله يجازيها الف خير
ويكون بعونها ما يدرى الواحده شلى الله كاتبه لها

حياج الله





فريج سعود :


الكلام سهل بس التطبيق وايد صعب
وخصوصا انها امراة
الله يكون بعونها

شكرا لمرورك ومشاركتك







ReLaaaX :


صح المجتمع ظالم بس لازم نتماشى معاه
ان شاء الله عيالنا يحصلون نتاج تطور افكارنا ويتحقق لهم كل اللى يتمنونه اما جيالنا فلازم ننحنى للريح
علشان نقدر نعيش براحه وسلام

حياج الله وانا شاكره لج تفاعلج

hoda said...

قصة ترملي أبكت كل من حولي، فأنا أرملة في السنة 23 من عمرها، مات زوجي رحمه الله منذ شهرين بعد ستة اشهر و نصف من زواجنا؛ كان زواجنا تقليديا و بالرغم من ذلك فقد أحب كل واحد منا ألآخر و أعجب به، فبالنسبة لي كان هو الشاب الثامن الذي يتقدم لخطبتي، أما هو فلطالما رفض الفتيات اللواتي عرضن عليه للزواج حتى صارت أخته تقول له إنه يجب علينا ان نبحث لك عن زوجة من خارج البلاد فقد تعبنا من البحث لك؛ لقد حصل اتفاق فكري و انجذاب من أول لقاء و حديث بيننا.
لم أكتشف مدى حبي له إلا بعد موته فأنا مستعدة لدفع حياتي مقابل عيش يوم آخر معه، تعلقت به كثيرا، لا تتخيلون كم بكيت و حزنت لفراقه. لم أصدق ما حصل إلا بعد مرور أسبوعين على وفاته، كان رحمه الله إنسانا محترما ، حكيما، مثقفا، صادقا و كان يمارس مهنة الطب في عيادته الخاصة، كان يحب فعل الخير لدرجة أنه كان أحيانا يتنازل عن تكلفة العلاج لبعض الفقراء.
لقد هز موته مشاعر الكثير من الناس فقد كان شخصا معروفا في المدينة، كان موته خسارة كبيرة ليس فقط لي بل للكثير من الناس لأنه كان إنسانا كفؤا خبيرا في عمله الذي كان يتفنن في القيام به.
موته لم يكن أبدا في الحسبان، فلم يكن يشكو من أي مرض؛ مات بسبب جلطة قلبية لم يكن يشكو حتى من أعراضها؛ مازلت أتذكر آخر يوم له في هذه الدنيا، كانت ساعاته الأخيرة في المستشفى، عندما حضرته سكرة الموت بدأت اصرخ على الأطباء و كنت أظن الأمر مجرد اختناق أو ألم عارض لكن عندما أتذكر تلك اللحظة أرى أن نظراته لم تكن عادية فقد كانت روحه تذهب إلى خالقها آنذاك؛
كثيرا ما أتساءل عن الحكمة الإلهية التي حكمت بأن أقضي معه آخر أيام حياته دون أي معرفة مسبقة لنا ببعضنا، أنا لست أعاتب قضاء الله لأن زواجي بهذا الرجل كان شرفا كبيرا لي، لا تتصورون كيف صارت سيرتي على كل لسان قبل و بعد زواجي به؛ لا أكف عن النظر إلى صور زفافنا، فقد أقمنا حفلي زفاف رائعين بشهادة الجميع، واحد في المدينة التي أسكن فيها و الآخر في المدينة التي كان يقطن فيها زوجي رحمه الله؛
حاليا أعيش حياة حزينة مليئة بالإحباط، لا أعرف لماذا يتملكني هذا الشعور الغريب بالفشل و الإحباط؟ و لست أنتظر إلا مرور فترة العدة حتى أستطيع الخروج للعمل، فقد حصلت سابقا على شهادة عليا تمكنني من ولوج سوق الشغل مرة أخرى، يجب علي أن أشغل وقتي بأي شيء لأن زوجي رحمه الله يشغل تفكيري طيلة اليوم، أكيد لن أنساه، لكن على الأقل خروجي للعمل سيخفف حدة ما حصل؛

أخيرا أريد أن أطلب منكم أن تدعوا لزوجي بالرحمة و المغفرة، أقسم عليكم أن تدعوا له بالرحمة و لجميع أموات المسلمين؛

hoda said...

أنا أنتظر دعمكم و نصحكم فأنا جدا متعبة

بنت الشاميه said...

hoda :

لا حول ولا قوة الابالله
هذا قضاء رب العباد فاللهم لا اعتراض

اللهم اغفر له ورحمه واعف عنه واكرم نزله ووسع مدخله وغسله بالماء والبرد ونقه من الذنوب والخطايا كما ينقى الثوب الابيض من الدنس
اللهم امين

لقد ابكتنى قصتك وحزنت كثيرا لك
ولكن ما باليد حيله...والله يصبرك وويسع صدرك على تحمل قضائه

ولكن الحياة لا بد لها ان تسير
والحي ابقى من الميت
وان شاء الله يبدلك زوجا خيرا منه
وحياة افضل منها
ما عليك الا الصبر والاحتساب لرب العالمين

وان شاء الله بالعمل والحياة الجديده تستطيعين ان تبدئي من جديد
رغم صعوبة البدايات دائما

واهم شيئ ان لا يوجد اي طفل لديك
فهذ يهون عليك مصايك
لان الاولاد حمل ثقيل على الارمله

ابدئ من جديد ولا تلتفتى ابد للماض
فالحياة قادمه لك والامل ان شاء الله موجود
الله يعينك ويوققك لما فيه الخير والصالح لك ولاسرتك
وحياك الله