Wednesday, February 04, 2009

جيل..... يبله صبر ايوووووب


أحب وايد أقعد وأسولف مع عيالنا الصغار
أحس إنى قريبه منهم وأحب تفكيرهم وصدقهم بالحجى
جنه جذى أقدر أرد العمر ورا.....وهذا طبعا حريمتى
لإن العمر مايرد دقيقة وحده ....بس من قلة الحيله
المهم قمت أسولف ويااااهم وأسئلهم
شنو أُمنياتهم بالحياة وشنو يبون يشتغلون
أول واحد
رد على قال أبى أصير ضابط
قلته غبره ليش... شهالقراده من الحين بتحط الهم على قلبك
طالعنى بعينه وسئل ليش الضابط مو زين..؟؟؟؟
رديته عليه قلت لا هى مهنه شريفه بس ليش تبى ضابط
قال أستانس أصيد الحرامى والقاتل ومهرب المخدارات
طقتنى البهره من الحين إنت تعرف كل هذول من وين..؟؟؟؟؟
ضحكوا كلهم علي وقالوا طبعا من التلفزيون
صفنت شويه ...الحين هذا شلون ارد عليه
بالعون منت صايد احد لإنهم اذكى من إن ينصادون
السرقات هالأيام كلها تتم تحت غطاء قانونى محد يقدر يصيدها
الكل يدرى إنه حرامى وبايق عيني عينك
بس محد يقدر يثبت إنه حرااااااامى
جان تقدر تصصيد الحرامى الصغير و القاتل ...يمكن
بس الحرامى العوووود والمهرب ماااااا أعتقد
جان يقول لى وينج ليش ما تردين علي
قلت له والله انك بطل بس لازم تنظف الديره منهم
ولا تخاااااااف منهم ...بيخوفونك بس توكل على الله
وإن شاء الله تقدر عليهم
جان تنط الثانيه قالت أنا أبى أصير طبيبه
أعالج العيايز والمحتاجين اللى ما عندهم فلوس
رديت عليها الله على طيبة قلبج....الله يعطيج على نيتج
بس إذا عالجتيهم ببلاش إنت من وين تعيشين..؟؟؟
ردت ببراءة الطفوله الله يعطينى حسنات ويبارك لى
هذا مو عمل خير...؟؟؟؟؟
الحين هذى شلون أرد عليها
رديت :هذا يسمونه عمل تطوعى بس يصير العصر
أما الصبح لازم تأمنين قوت يومج لج ولعيالج ولريلج
جان ترد على بسرعه .....لا لاتخافين أنا
بتزوج واحد غني
شنوووووو بتتزوجين واحد غني....؟؟؟؟
شلووون تعرفين هالحجي......؟؟؟؟
ردت ماكو أسهل منها ماكو شيئ صعب هالأيام
مثل المسلسلات والأفلام والمجلات
والإ... أبوى يعطينى الفلوس ويعطى ريلى وعيالى
أبيه أبيه ....ريل غنى والإ أبوها يصرف عليها
لا هذا جيل ما يعلم فيه الإ ربنا
لا لا لا لا لازم أقوم عنهم لا يطير عقلى
وأحس إنى من عالم غير ....أبيه تبى ريل غنى
وصارت الصيحه لإن بعضهم ماجاوبونى وبدوا يزعلون
وأنا لازم أخلى روحى رياضيه وأوسع صدري
وأسمع لهم قلت يالله بس بسرعه
وحده قالت: ما تبى تشتغل تبى تصير مثل أمها
تقعد بالبيت وتربى عيالها وتسافر وتسانس بحياتها
طبعا عطيتها هذيك النظره وبققت لها عيونى
بس حقرتها ....... ماااااا رديت عليها
والرابع .....قال أبى أصير كابتن بحري
أبى أشوف العالم وأتعلم لغات
قلت أشوه أكو واحد رحم عقلي وبرد جبدي
وسألت الأخيره إنت شتبين بالحياة...؟؟؟؟؟
قالت : أنا أبى أصر أبله وأبى أفتح مدرسه
أعلم الأطفال اللى يحبونه مو اللى يحبونه الكبار
المدراس كله صراخ وخناق....حتى كرهونى فيها
أبى الياهل يروح المدرسه مستاااااانس
لإنه يحب المدرسه ويحب الدراسه فيها
مو يكره المدرسه والمدرسين والدروس
وبعد أعلمهم فيها الموسيقى والرسم والباليه
وكرة القدم والسلة وجميع انواع الرياضه
و....و .......إلى إن صكت راسي
وإحنا نقول هذول أطفال ما يفهمون شيئ بالحياة
تصدقون ماااا عرفت أرد عليهم

كلامهم فيه من المنطق الكثير....بس ما يصير
أن يطبق بالحياة....لإن الأمور تختلف وايد
عن واقعهم.....بس بديت أعيد تفكير بعلاقتى معاهم
لإنى لازم من اليوم وطالع أتخذهم أصدقاء
مو أطفال.....أول أول أول ليش إحنا مو مثلهم...؟؟؟
ماااااا عندى إجابه.....عندكم اجابه

36 comments:

enter-q8 said...

تبين الصج طلعنا احنا اللي ما نفهم مو اهم
الفرق بينا و بينهم
ان حياتنا كانت بسيطة و كان الواحد يستانس على ابسط شي يكون غير متوفر اعطيك مثال
تتذكرين كاكاو فليك و كادبوري لما كان يجينا من لندن

Anonymous said...

أنا أبي أتزوج وحده ابوها غني وما أشتغل

nikon 8 said...

زين منا طلعنا كذي ... حنا نتاج أجداد أميين وكم جريدة وقناة تلفزيونية وحده تعرض مسلسل واحد للأطفال كل رمضان وإن جاتنا الرطوبة طلعت لنا إيران نطالع ولا نفهم شيقولون
؟؟؟

Mamloo7a Q8ia said...

يحليلهم هاليهااااال
عندهم سوالف مادري من وين يطلعونها
:)

هالجيل يا وخيتي جيل الكمبيوتر والانترنت والموبايل
يخرعون كل ما تكلمتي في شي
يعرفونه اكثر منا

جيييل الحياة السريعه
مسااااكين مو مستمتعين بطفولتهم

احنا جيلنا كان بسيط بريء
عشنا مراحلنا العمريه
واستمتعنا في كل مرحله
كل ما كبرنا تعلمنا وفهمنا

مو هالجيل
طالع من بطن امه عارف كل شي
يخرعون ماكو ذيك البراءه
اللي كانت فينا


شوفي ام 14 الحين
وتذكري اشكالنا في ذاك العمر
@@

هذوله مو يبيلهم صبر ايووووب
الا يبيلهم قلب وعقل يتفصلون على مقاس افكارهم وتصرفاتهمم

الزين said...

ايييييه يا بنت الشامية

حتى احلامهم غير

عز الله ايامنا


:)


انا كنت ابي اصير.... ولا تدرين ما ابي اقول احسن

بس هم احلامنا كانت وايد ابسط


:**

shakshaka said...

ياحلوووووهم اسمالله عليهم و كلامهم وايد منطقي غير هذا والله انهم يستخدمووون عقولهم مثال على هالشي ولد خالتي ياهل ما تعدى عمره 3 سنين ونص واخوه الكبير مريض فا زهق يبي يلعب يقول حق امه ماما حطيله بطاريه او charge him هاهاهاها
دليل على ذكاءهم و طريقة تفكيرهم غريبه

Shurouq said...

بنت الشامية
ولد خالتي عزوز كان عمره ست سنوات تقريبا لما سألناه هالسؤال، تدرين شنو كان رده؟
قال الله يسلمج: أبي أصير تاجر مخدرات

ولا تشوفين ويوهنا حزتها

أقول قولي هذا وأتمنى أن لا يشوه هذا الاعتراف من سمعة عائلتنا الكريمة

حسافتج يا كويت said...

ترى مساكين اليهال

وين البراءه

وين الطفولة

كلة من فجير سنت سنّه والكل تبعها عقبها


أنا شخصيا يكسرون خاطري اليهال اللي ماعاشوا طفولتهم

ReLaaaX said...

اسمالله عليهم الله يحفظهم ... والله واهما صاجين .. هذا اللي قاعدين يشوفووونه



حبيت الطبيبة حرم الهامور ;p

والمدرسة ماتدري ان اول التدريس طموح واحلام بالتغيير وبس تتدبسين تحسبين شكثر باقي على التقاعد :)

lawyer said...

اسسسسسسسسسسم الله عليهم يصدمووووووووونج بالحجي



ههههههههههههههههههههههههه


الله يحفظهم

عقباااااااااااااااااال عيااااااااااااال الجعده انشاء الله حزززززتها مدري شنو بيقولوووووووووووووون

فريج سعود said...

ما قلتي انتي شنو تبين تصيرين لي كبرتي ؟

Anonymous said...

عيالكم يخرعون

كويــتي لايــعه كبــده said...

الحمد لله محد قال لك أشتري شهادة والا اطبل لعلالي القوم لين اصير وزير وهذه تجارتي الناجحة

Kandroz said...

لوووول ياحلاتهم :D
الله يحفظهم ويخليهم لكم انشالله
انا تعجبني عقليات اليهال لما اسولف معاهم جذي ,, احسه يفهم وااايد بس مايعرف يعبر عن كل شي ,, جنه يقولي ليش تكلمني جني ياهل ؟
عنده كلام وايد وفاهم بس ما يقدر يعبر ! على الرغم من خياله الواسع وتفكيره المحدود بس يقدر انه ساعات " يجعمنا " بكلامه وبسوالفه

لوووووووول استانست على هذي اللي تقول ابي اتزوج واحد غني :P
صج التلفزيونات لاعبه دووور !

الله يخليهم لكم : )
تقبلي مروري

بنت الشاميه said...

Enter-Q8 :

اجمل ما كان فى حياتنا البساطه والعفويه واحلامنا على قدنا
وقدرنا نحققها البعض منها بحياتنا
لا...لا... لا تذكرني فيه عاد كل شيئ الا فليك
كااااان له طعم ثاااااني
الى الحين وان اتذكره ...كل ممنوع مرغوب
ههههههههههههه

بنت الشاميه said...

أجمل واحد ابتهم :

خووووش شغل
بس قوم يالله قوم لا يطوفك الدواااام
بسك من احلامك البنفسجيه
ههههههههههههه

بنت الشاميه said...

nikon 8 :

كله اقول اول كنا ندعم الطوفه
من كثر ما نطيع ...لان كل على بالهم مانعرف وما نفهم وهم اللى لازم يخططونه لنا كل شيئ
الحين اقول يزااااهم الله الف خير سوووونا
ريايل وحريم يعتمد علينا بكل شيئ
الحين الوضع وايد صعب...يبلهم صبر ايووووب.....الله يعينا عليهم
حياج الله

بنت الشاميه said...

Mamloo7a Q8ia :

هلا بالشيخه ....وينج من زمااان
نورتينا بالزياره
اي والله الحين يبلهم قلب وعقل يتفصل على مقاس افكار كل واااااحد منهم
على حده لان محد يشبه احد هالايام
كل ما تذكرت طفولتى استانس
لانى عشتها بالطول والعرض
صج تمتعت فيها....وارد واقول الله يجازى والدينى الف خير....لانهم تحملوني
هههههههههههههههههههه

بنت الشاميه said...

الزين :

واللى يسلمج قول لى شكنتى تبن تصيرين
لا تستحين....الحين يسمونها حرية التعبير عن الراي...ههههههههههههههههههه
على الاقل كانت عندج امنيه
احسن من غيرج واااايد
بس ياااحلو زمنا احسن من زمنهم الف مره
كان فيه امن وامان بكل شيئ
الله يكون بعونهم

nanonano said...

ويــــــي يا بنت الشاميه

يهال هالوقت أسم الله عليهم

يدخلونج البحر و يطلعونج ناشفه

يا زينهم

أنا أستانس على سوالفهم

لأنهم على طول يفاجئونج بسوالفهم

بنت الشاميه said...

shakshaka :

الله يحفظهم ويعينهم على زمنهم

اليهال تغيروااا بس احنا لازلنا نعاملهن كاطفال
الحين احنا اللى لزم نتغير علشان نقدر ونعرف شلون نتواصل معاهم
الله يخليهم

بنت الشاميه said...

Shurouq :

هلا وغلا
شروق
انا ترا حاذفه واااايد من كلامهم لان اللى قالوه لو يسمعونهم امهاااتهم يروحون فيها...ههههههههه

ما ادري احنااللى وقف فينا الزمن
والا الزمن عندهم اسرع منا
وعزوز قال الحقيقه....هذا نتاج الافلام والمسلسلات اللى يشوفنها
هذى اضغاث احلام
والعائلة الكريمه سمعتها مصانه إن شاء الله على طول
ولا تتحمل احلام اطفالهااااااا
زارتنا البركه

بنت الشاميه said...

مبيوق :

ذنوب احلااااام عيالنا الصغار
برقبة فجر
الى يوم القيامه
والله انت صاج هى ساس البلى
الله يحفظ عيالنا منها ومن امثالهاااااا

بنت الشاميه said...

ReLaaaX :

اما الطبيبه حرم الهامور يبلها طق على ظهرها وبطنها
قصت على باول وقلت يالله شهالطفوله البرئيه....الا طلعت الاخت مدكنه
لوووووول
الصج اللى عجبتني اللى بتفتح مدرسه
اهم شيئ بتعلمهم كرة القدم
لوووووووووول

بنت الشاميه said...

lawyer :

الله يخليهم وايد استانست وياهم
وعطونى درس لازم ابد ماااا انساه
ان عندهم عقل يفكر...وعندهم احلام


واااااي لوووووير
ياااااحلو اليعده وياااا حلو عياله
تروالى بمووووت عليهم من الحين
هو بكبره الى الحين ياااااهل عندي
لا ....وقام يزعل اذا سمع هالحجى
يسلم قلبه.....الله يهداج ليش ذكرتينى فيه ....عورنى قلبي
هههههههههههههههههه

بنت الشاميه said...

فريج سعود :

كنت اتمنى ان اصير محاميه

Anonymous said...

اه ه ه ا ه ه يا الربات

فن """ الربات فن محظوظ من يجيده
ويعبر ضناه المخاطر

والا سسسوالفهم خيال الطفوله

تونس وذكرناهم فيها لما كبروا

الغصه المراهقه واول بشاير العشرين

وخاصة البنات """"ياحلو حنانهم
وخدمتهم لوالدينهم

وياكثر خطورتهم بصمتهم

ياريت كل يقرقون ويهذرووون

الصدر ينشرح لهم """لكن لايدشون الدار ويصمتون ويحقرووون

هذا الموووت بعينه واعلمه
شكراو
حفظ الله هالجيل من جيله

بنت الشاميه said...

maqhor :

ليش اللى عندكم غير...؟؟؟

بنت الشاميه said...

كويــتي لايــعه كبــده :

لا الحمدلله ماقلوا جذي
جاااان قضوا علي

بنت الشاميه said...

kandroz :

الله يسلمك ويخليلك كل احبائك

الميزه بكلامهم الصدق وانهم متفائلين لمستقبلهم.....واللى اكتشفته انهم ما يستحون ولا يترددون يقولون الكلمه
وما عليهم......هذا نسميه جراءه
الحين والا قبل كانوا يقولون طوالت لسان وو....و....و يخلون الياهل ما يكمل كلامه
الزمن تغير وبدوا يفرضون علينا اللى يبونه وما لنا
الا الدعاء لهم بان الله يحفظهم
جياك الله وشكرا لمرورك اسعدنى

Barrak said...

هذا الجيل مظلوم

لانه يشتعل نشاطا
وكل شي حوله سهل


بس يارب يارب مايكسرون مياديفهم

الله يخليهم لكم


موضوع وايد مهم

اشكرك على اثارته بهذه الطريقه الممتعه

Anonymous said...

ابد لانضحكون عليهم
ولا تكسرون مجاديفهم
الله يحفظهم ترى الياهال طول عمرهم انبه مننا


احنا الدنيا شاقتنا شق هههه متشوشين
غيرهم اهم اسم الله عليهم بالهم مرتاح

الله يحفظهم ويرزقني كوكش يهال هههههههه
;Pp

بنت الشاميه said...

nanonano :

الله يخليهم ويسلمهم
صج يونسووووون
بس يبلهم قلب

الله يحفظهم

بنت الشاميه said...

mob :

لو ما المربي جان ما عرفت اربي
اللي نقدر عليه بنسويه لهم والباجى على لله
وعلى صكت الدار عندك وعندناااا خير
هذا موجود هالايام وبكثره وبكل بيت
وسسسع الصدر .....والله الحافظ

بنت الشاميه said...

Barrak :

مرحبا بشاعرنا العزيز
المدونه منوره اليوم
==
ان شاء الله محد يقدر يكسر مياديفهم
بس الخوووووف عليهم...هو اللى بيذبحنا
وشكرا لك هذى شهاده منك
حيااااك الله
ولا طول الغيبه علينا

بنت الشاميه said...

انونيمس بالعربي :

لا والله ما نضحك عليهم
الا نتحلى عليهم....وعلى تفكيرهم وجرأتهم بطرح افكارهم وثقتهم بنفسهم
صج اعجبووونى...كل من يفكر بطريقه مختلفه عن الثاني....عندهم استقلاليه
وان شاء الله يحقق امنياتج وتيبين كوكش يهااااااال