لما نتجمع فى بيت العائله الكبير
أنا وإخواني وخواتي وعيالنا وأحفادهم وجناينهم
نشكل تقريبا كل أطياف الفكر السياسي بالكويت
بالرغم ان كلنا تربينى نفس الشيئ و بنفس البيت
ومن نفس الأم والأبو
ولكن... لما كبرنا كل منا كون له حياته الخاصه
وصار له بيته وعائلته الصغيره وحمولته
وأصدقائه.و.و.!!!ء
صارت أفكارنا السياسيه مختلفه ومتنوعه
فينا اللى يمشى بالبركه
وفينا الحكومي
وفينا الليبرالي
وفينا الحدسي
وفينا السلفي
وفينا اللى مو مصدق ان اللى فجرابراج التجاره
من القاعده وربع بن لادن والى الحين يدافع عنهم
مع انه مو منهم بس من ربع نظرية المؤامره
وطبعا هالأيام النقاش واااااصل حده
والإختلافات السياسيه على أوسع أبوابها
وكله نتحفظ بالنقاش علشان أمى
كله حسبالها نتهاوش..وتخاف أى واحد فينا يزعل
وطبعا طبعا طبعا كله تزفنا إحنا البنات
ليش كله حسبالها نطول لسان على إخوانا ونعاسرهم
وما نطيعهم ونحرهم.....أهم شيئ إن نحرهم
وتطيح فينا زف...لإن البنات لازم ما يتكلمون
وما يراددون إخوانهم الريايل لإنهم هم اللى
يفهمون أكثر لانهم يروحون الدواوين
ويسمعون ويعرفون كل شي
وخصوصا عاد ""أخوي الجبير."".حبيب القلب
لووووووووووول
وطبعا هم يسووووقون فيهااااا...ويتولوناااا
وإحنا البنات نتقيصر بالحوار معاهم
و نسكت ما نبيها تزعل ويضيق خلقها
وبعد كل هالصيحه واللى طبعا ما نوصل فيها
إلى نتيجه أوالى أى تقارب بوجهات النظر
نقوم للعشا وجنه ما صار هالإختلاف الحاد بالاراء
نتغشمر ونضحك ولا أحد في قلبه شيئ على الثاني
ما يجمعنا إلا الحب والموده والعطاء والإيثار للأخر
وما نطلع الإ وأمي الله يحفظها ويطول عمرها
تودعنا بدعائها المعروف
ان الله يألف بين قلوبنا ويحمينا ويوفقنا
ويحنن قلوبنا على بعض
ويحفظنا ويحفظ الكويت ويحفظ شيوخنا
ويجعل الكويت أرض محبه وسلام
ويبعد عنها كل شر ويطخخ كل الشياطين فيها
وينصرها على كل من يعاديها
وهالايام تزيد فى دعائها
ان تخلص هاللغوه والنجره اللى بكل مكان
بالتلفزيون وبالراديو وفى ببيتهاااااا
بخير وامن و سلااااااام
للكويت .... وللكويت وبس
وسلاااااااااامتكم
ليت المجتمع الكويتي كله يتناقش ويتحاور مثل عايلتج الكريمه
ReplyDeleteعسى الله يخليهم لج ويحفظج لهم
ههههههههههههههه
ReplyDeleteذكرتيني بأمي وحبها لآخوي اللي أصغر مني بـ ٥ سنين
كله أهو الصح وأحنا اللي ما نعرف
:)
لاااا يت تكلمه كله (يا حبيبي) و (أسم الله عليك) وأنا كل مناشبتها على هالسالفة
لوووول
أقول لها : ألحين من يقفي فلان طالع .. ما يبقى دعاء ما تقولينه له
وأنا من أقفي .. ودج تصقلين الطيران وراي من الفرحه هاااا ... ههههههههههههههه
:)
ميننتــــها
لووول
يااااا حلاااااتهم الأمهات الله لااااا يخلينا منهم
ياااااااارب
تدرين سردج لعائلتك الكريمة وأختلاف التوجهات ولآراء
ونقاشكم
وفي الآخر .. تتفقون وتصافون عشان خايفين على زعل الوالدة الله يحفظها
هــــذا كله .. صـــــوّري
أن الوالدة .. رمز الكويت
وأنتي وأخوانك .. رمز الشعب
ومهما أختلفوا وتناجروا .. بالأخر يتفقون ويتصافون
خوفا على ديرتهم الكويت .. اللي مالهم غناة عنها
هذا اللي مفروض يصـيـــــــــــــــــــــر
الله لاااااا يحرمكــــم من بعض
:)
ويـــــــــــــي
ReplyDeleteبنت الشاميه
حدّه عندنا و عندكم خير
نفس الموديل كل سبت يمعتنا أنا و خواتي و أمي و خالتي و بناتها و يدّتي و خوالي
بس مشكلتنا في خالتي
و يدّتي كلّه صافه معاها
و كل سبت هذا موديلنا أنتصعقر لي الستار عقب يطيح العشا
جنّه مو صاير شي
بنت الشاميه ...بيتكم يسوي دورات.. كيف تتقبل الراي الاخر..؟؟؟
ReplyDeleteاذا الجواب بنعم تراج بتكسبين اجر فينا وفيهم
اكو واااايد ناس ابيهم يتعلمون
شلون يسكتون ... اذا لم يتقبلوا الراي الاخر
ويحترمونه....تراهم ترس الديره
الله يهنيج بهالاسره الراقيه بتعاملها
السلام عليكم جميعا
ReplyDeleteشلونج يالغاليه انشالله بخير انتي ومن تحبين
وربي يخليها لكم حلوت اللبن
ويعطيها الصحه والعافيه
اختلاف الاراء حاله صحية .. وتجعل الاخرين يبحثون عن الصواب وما يصبون اليه ... لك ولجميع افراد العائلة تحياتي وعساكم تتجمعون على المحبة دوم .. وللجميع تحياتي
ReplyDeleteالله يجمعكم على طاعته و لا يفرق بينكم ويخليلكم الوالدة و يطول بعمرها و يديم عليها الصحة والعافية
ReplyDeleteيحليلها الله يخليها لكم
ReplyDeleteبس موتودينها الانتخابات و اتحطين اللي انتي تبينه و قوليلها ماعليها من اللي يدقون عليها تلفونات ترى ماعندهم سالفه
بنت الشامية
ReplyDeleteمن أسباب أنتشار السلام العائلى الحرص على وجود حميسة بزاليا وخبز حار على العشاء
بالعوافى
ذكرتيني ايام الكويت لما كانت عايلة حلها نفس عايلتكم
ReplyDeleteاول مره اسمع بهالإنتخابات كلمة عنصرية و تفرقة واضحة من المرشحين في قياس المناطق الداخلية عن الخارجية
حتى المدونين
جنه مو كلنا عايلة وحده!
يا زين امهاتنا
ReplyDeleteويازين حرصهم علينا وانا ما انتفرق ونكون على قلب واحد وقلبنا على الكويت
الله يخليها لكم ويخليكم حق بعض
--------
وأنا من أقفي .. ودج تصقلين الطيران وراي من الفرحه هاااا ...
ديللي @@
كااااااااااااااك
--------
ليست الغاية ان نتفق
ReplyDeleteالغاية ان لا نختلف
:)
نتناقش
تعلى اصواتنا
نرد على بعض
ونرجع نضحك بقلوب صافية
تدرين ليش
لأن داخلنا قناعة إن كلنا هدفنا واحد
كلنا ندور مصلحة ديرتنا
وان اختلفت الاساليب والافكار
الله يحفظكم ويخليكم لبعض
احلى ماقريت اليوم يابنت الشامية
:)
أول شي الله يحفظ أمج ويطول بعمرها ويخليها
ReplyDeleteوالي قاعد يصير عندكم هذا المفروض انه يصير بالمجتمع لأنه أختلاف الافكار المفروض انه ما يغير القلوب ويزرع فيها الاحقاد الله يخليكم حق بعض ولايفرقكم شي شنو ما صار
وقولي حق أمج الحر يقول ذكريني بدعائج
:)
جذي النواب يتناجرون في المجلس وآخر شي يودونهم مزرعة عزايز ياكلون مع بعض ويتغشمرون وكأن مابينهم شي
ReplyDeleteالله يحفظكم
بيت العائله الكبير الى يقول قصر بيان اقصاه خرابه
ReplyDeleteالله الشافي
الله يخليلكم اياها ياربي ياحلاتها والله
ReplyDeleteصح الامهات يخافون على عيالهم ولا يبون اي شي يصير بينهم
أمبيه ذكرتيني بيدتي
ياقليبي تعاااااالي شوفي النقاش الاسبوعي
والله اللي احنا ( الاحفاد ) نتملل متى يخلصون نقاش !!
بس مرات بيني وبينج يزيد النقاش لدرجة ان يدتي تصرخ عليهم لوووووول
بس انتو اخوان بس .. ياقليبي عبالها يتهاوشون
وبوقت الغدا مثل ماقلتي كلنا نيتمع
:)))
هههههههههه
ReplyDeleteما شوفين امي ماكوا نقاش ابد ابد... ما تروح الا حق الخرافي ومرزوق وخالد السلطان
والباجي تقول ما اعرف حجيهم
واكلهم يلوع الجبد ...كل من مطاعم حولي والشويخ الصناعيه
واخرتها بتسافر البحرين معزومه
عرفتيني ماني قايل اسمي
اخاف افضح امي
حنطفيس :
ReplyDeleteهذا اللى ربانى عليه الوالد الله يرحمه ويغفر له
قبول واحترام الراي الاخر
وحرية الاختيار
الفضل له الله يرحمه
ومشكور على هالدعاء الزين
اللهم امين وللجميع
DiLLi O MiLLi :
ReplyDeleteالله يحفظهم ويخليهم لنا هم نورنا اللى نشوف فيه
ما ادري ليش الامهات يصيرون ساعات جذي
تصدقين انا عندي اليعده غير....وما ارضى عليه وكله انا بصفه عليهم...احسه وايد قريب من قلبي
مع انى ما افرق بينهم ...بس سبحانه ادرى بعباده
بس حرام عليج امج بس طفرج
اكيد من كثر الدحره
ههههههههههههههه
اما تصورج ما كو اروع منه
والله وانت صاجه
وان شاء الله يصير بكل بيت
ما كو شيئ بعيد عن ويه الله
الله يحفظ الكويت ويحميها من كل من يريد شر فيهااااااا
:*
nanonano :
ReplyDeleteاي والله اتوقع هالايام كل البيوت جذي
بس تختلف بدرجة مساحات
حريه الفكر عندهم
واختلف الراي مفيد بكل بيت
وحالة صحيه
المهم ما نفقد بعضنا البعض من اجل
بس اختلاف الراي
هذا اكره شيئ
الله يديم المحبه والموده فى بيوتنا كلنا يارب
القارب :
ReplyDeleteاذا تعمرت البيوت بالمحبه والموده
ما يحتاج الانسان دورات
وما يصير شيئ صعب بالحياة
ما عندنا فى بيتنا الا المحبه والموده والعطف والعطاء لبعضنا البعض
شكرا لك وحياك الله
الحجـــيّه :
ReplyDeleteهلا فيج والله انت الاغلي
صج ولهناااا عليج
وين هالغيبه الطويله
ان شاء الله على كل الخير
ويخلي لنا كل حلوات اللبن
اللهم امين
مشكوووووره على الزياره
:*
abo3li :
ReplyDeleteكلامك صحيح اختلاف الاراء حاله صحيه
ويساعد على المعرفه والالمام بوجهات نظر مختلفه عن فكر الواحد
وشكرا لك على الدعاء الجميل
الله يديم المحبه ببيوتنا كلنا ان شاء الله
اللهم امين
Anonymous 1 :
ReplyDeleteاللهم امين وجميع المسلمين يارب
وعمرك وعمر كل محبينك
ميمة السبيت :
ReplyDeleteمشكوووره
لا هى رافضه تنتخب من اول
وتقول هذى كله لغوه ما منها فايده
عسى الله يخلي لنا شيوخنا هم راس المال
هذا مبداء بالحياة
(((:
daggero :
ReplyDeleteذوقك جدا عالى بالاكل
بس لو سمحت مع صمون وبطاط شبش
مو مع خبز
لووووول
4 :
ReplyDeleteاذكر الله ما كو الا العافيه
ايام وتخلص الانتخابات
وتهدا الامور
والله يحفظ الكويت ويبعد عنها الفتن
ARTFUL :
ReplyDeleteهم نورنا اللى نشوف فيه
الله يحفظهم واحنا عايشين بحسهم
والله يحفظ الكويت واهلها الطيبين
اللهم امين
Najmah :
ReplyDeleteهلا بالشيخه
ومشكوره شرحتى صدري
كلنا ان شاء الله متفقين على حب الكويت
وهذا هو الاهم
والله يحفظج ويخليج لاهلج
حياج الله
الحــــٌر :
ReplyDeleteالبيوت ان تعمرت بالحب والموده بين افراد اسره ما تفرقهم اختلاف الاراء
لان الاصل موجود
الله يديم المحبه والموده بين كل اهل الكويت
ولا تخاف امي تشمل بدعائها كل اهل الكويت والمسلمين بكل مكان
بس اليوم احرصها ان تذكر اسمك
عاد ان نسته مااا علي منك
لووووول
إمـرأة لا تُنسـى :
ReplyDeleteالمهم فى كان يتلاقون ويتصافون مع بعض
(:
ويحفظ الجميع
اللهم امين
Anonymous 2 :
ReplyDeleteالخرابه كل طابوقه فيه فيها محبه وموده ورحمه وحنان وتصالح مع النفس
هذا شيئ انتو محروميين منه
ولا تعرفونه
الله يعينكم على انفسكم
الله يثبتكم ويجمعكم على الخير
ReplyDelete:)
حبوا هالارض وتمسكوا بدستروكم
ReplyDeleteالامير ابو الدستور عبدالله السالم
ReLaaaX :
ReplyDeleteما كو احلى من اللقاءات العائليه
الله يكثرها ولا يحرمنا منها
ويعطي امهاتنا سعه الصدر
ويحفظهم ويبارك لنا فيهم
ويحفظ الكويت لنا ولهم
حياج الله
Anonymous 3 :
ReplyDeleteما يحتاج عرفتك وعرفت امك
اثاريها تروح لهم
خليهم ينفعونهااااا
والا شدعو النيباري والعنجري والعبد الجادر والراشد شفيهم
كلهم يحجون كويتى عدل...شهالعياره ما تفهم كلامهم...!!!!ء
نيب لها مترجم
خلها تروح البحرين و الطياره الثانيه علي ....اغويها ديرتهاااااااااااا
لوووووووووووووووول
Manal :
ReplyDeleteاللهم امين
مشكووووره
أهل شرق :
ReplyDeleteاباءنا واجدادنا حبوا هالارض
قبل الدستور
لازم نحبها فيه وبلا اياااه
حبها بقلوبنااااااااا
بدونها ما نسوى شيئ
بس ما قلتي لنا يا بنت الشاميه شنو العشاء يكون ؟؟؟ لأن ساعات العشاء يزيد النجره :)
ReplyDeleteUm il sa3af wil leef :
ReplyDeleteما يصير الاتفاق الا عند الاكل
عند البطون تعمى العيون
هههههههههههههههه
شرط امي الوحيد عند الاكل ماااا كو نقاش...بس سوالف وغشمره
تحياتى لج